ସେ ଆମ ଜୀବନଧାରା
ସେ ଆମ ଜୀବନଧାରା
ସୁନ୍ଦର ସରସ ଆମ ପରିବେଶ
ତହିଁରେ ଆମର ବାସ
ସେଇଠି ହରଷେ ବିତୁଥାଏ ଆମ
ଦିନ ଦଣ୍ଡ ବର୍ଷ ମାସ ।।
ଥାଉ ଆମେ ସେଠି ମାଟି ପାଣି ଆଉ
ପବନକୁ ସାଥୀ କରି
ଆମରି ସୁଖରେ ଗଛଲତା ସେଠି
ଅଛନ୍ତି ଜୀବନ ଧରି ।।
ଗଛରେ ପତର ଫୁଲରେ ସୁବାସ
ଫଳରେ ମଧୁର ରସ
ଯତନେ ରଖିଛି ସବୁ ସେ ହେବାକୁ
ଆମ ଖୁସି ଆମ ହସ ।।
କଳାବଉଦିଆ ମେଘରେ ଆକାଶ
ସାଜେ ସେଠି ଆମ ପାଇଁ
ଜଳଟି ଆମର ଜୀବନ ବୋଲି ସେ
ଦେବାକୁ ଆସଇ ଧାଇଁ ।।
ମାଟିରେ ସେଇଠି ଥାଏ ସୁନା ରୁପା
ଆହୁରି ଦରବ କେତେ
ମାଆ ପରି ପୁଣି ସହେ ସେ ଆମର
ଅଳି ଅରଦଳି ଯେତେ ।।
ଶାଳ ପିଆଶାଳ ଶିଶୁ ଶାଗୁଆନ
ଧରିଥାଏ ସେଠି ବନ
ଆମରି କାମରେ ଲାଗନ୍ତି ସେମାନେ
ସେସବୁ ଆମର ଧନ ।।
ନିଜର ଆମର ପରିବେଶ ସିଏ
ବୁଝି ଆମେ ତା'ର ଗୁଣ
କରି ତା'ର ସେବା ଆଦର ଯତନ
ସୁଝିଦେବା ତା'ର ଋଣ ।।
ଲୋଡ଼ା ସେ ଆମର ତା' ସାଥିରେ ଆମେ
ଥିବାଟି ଜୀବନସାରା
ସୁଖରେ ଥିଲେ ସେ ସୁଖୀ ଥିବା ଆମେ
ସେ ଆମ ଜୀବନଧାରା ।।