ସ୍ୱଚ୍ଛ ପରିବେଶରେ ଆମେ ଓ ବୃକ୍ଷ
ସ୍ୱଚ୍ଛ ପରିବେଶରେ ଆମେ ଓ ବୃକ୍ଷ
ଆକାଶ ପୃଥିବୀ ଅଗ୍ନି ଜଳ ବାୟୁ
ଜଡ଼ ଓ ଚେତନ ଯେତେ
ସବୁ ପରା ସେହି ଈଶ୍ଵରଙ୍କ ସୃଷ୍ଟି
ସଂସାରେ ରହିଛି କେତେ ll1ll
ସବୁରି ସମ୍ପର୍କ ଓତଃପ୍ରୋତ ଭାବେ
ରହିଛି ହୋଇ ଜଡିତ
ସମସ୍ତେ ଅନ୍ୟର ମଙ୍ଗଳ ନିମନ୍ତେ
ନିଜ କାମେ ନିୟୋଜିତ ll2ll
କେହି କାହାଠାରୁ ଅଳପ ନୁହନ୍ତି
ନିଜ ଅବଦାନେ ରତ
କୀଟପଶୁପକ୍ଷୀ ବୃକ୍ଷ ନଦୀ ପାଣି
କରନ୍ତି ସଭିଏଁ ହିତ ll3ll
ବଣ ଜଙ୍ଗଲଟା ଅଟେ ଫୁସଫୁସ
ଏଇ ପୃଥିବୀର ପାଇଁ
ଦୂଷିତ ବାୟୁକୁ ବିଶୁଦ୍ଧ କରଇ
ଅମ୍ଳଜାନ ଦିଏ ସେଇ ll4ll
ବର୍ଷାର କାରଣ ମାଟି ସଂରକ୍ଷଣ
ଧୂଳିକଣା ରଖେ ସେଇ
ବୃକ୍ଷଜଗତର ଦାନ ଯେ ମହାନ
ପରିବେଶ ସୁସ୍ଥ ପାଇଁ ll5ll
ଅନ୍ନ ବସ୍ତ୍ର ବାସ ପଥି ଓ ଜୀବିକା
ଜଙ୍ଗଲ ଆମକୁ ଦିଏ
ତାହାରି ସୁରକ୍ଷା କରିବା ସମସ୍ତେ
ଶପଥ ନେବା ସଭିଏଁ ll6ll
ନକାଟି ଜଙ୍ଗଲ ନୂଆସୃଷ୍ଟି କଲେ
ଜଙ୍ଗଲୀ ଜୀବ ବଞ୍ଚିବେ
ଅନେକ ପ୍ରଜାତି ଲୋପ ହୋଇଲେଣି
ଚିତ୍ର ହୋଇ ସେ ରହିବେ ll7ll
ମିଛ ପ୍ରଗତିର ଦ୍ୱାହି ଦେଇ କେତେ
ପ୍ରକୃତିକୁ ଦଗା ଦେଇ
ସ୍ୱଚ୍ଛ ପରିବେଶ ପାଇବା କିପରି
ଆମେ ସଜାଗ ନ ହୋଇ ll8ll
ଭାତ ତ କିଣିଲେ ପାଣିବି କିଣିଲେ
ବାୟୁ କିଣିବା ସରବେ
ଏବେ ଠାରୁ ଯଦି ସତର୍କ ନ ହେବା
ଆଗାମୀ ପିଢ଼ି କାନ୍ଦିବେ ll9ll