Become a PUBLISHED AUTHOR at just 1999/- INR!! Limited Period Offer
Become a PUBLISHED AUTHOR at just 1999/- INR!! Limited Period Offer

DILIP KUMAR SAHOO

Classics

4  

DILIP KUMAR SAHOO

Classics

ରଥଯାତ୍ରା

ରଥଯାତ୍ରା

3 mins
407


 

ଜଗନ୍ନାଥ ଜଗତ ନାଥ

ଚକାଡୋଳା ଲିଳା ଅଦ୍ଭୁତ ।


ପ୍ରିୟ ପରିଜନଙ୍କ ମେଳେ

ବିଜେ ତୁମେ ବଡ ଦେଉଳେ।


ଦୀନ ବନ୍ଧୁ ଭକ୍ତ ବତ୍ସଳ

ଭକ୍ତ ପାଇଁ ପ୍ରାଣ ଆକୁଳ ।


ବାରମାସେ ତେର ଯାତରା

ଭକତଙ୍କ ଦୁଃଖ ପାଶୋରା ।


ପାଇବାକୁ ତୁମ ଦର୍ଶନ

ସାରା ବିଶ୍ବ ନିତି ଉଚ୍ଛନ୍ନ ।


ଧନ୍ୟ ତୁମେ କଳା ସାଆନ୍ତ

ଧନ୍ୟ ତୁମ ରଥଯାତ୍ରା ତ ।


ଆଷାଢ଼ ଶୁକ୍ଳ ଦ୍ୱିତୀୟା ରେ

ରଥ ଯାତ୍ରା ହୁଏ ଶ୍ରୀକ୍ଷେତ୍ରେ।


ପତିତ ଙ୍କ ଉଦ୍ଧାର ପାଇଁ

ସ୍ବବିଗ୍ରହେ ଆସ ଓହ୍ଲାଇ ।


ରତ୍ନବେଦୀ ରୁହଇ ଖାଲି

ପ୍ରଭୁ ଯାଅ ରଥରେ ବୁଲି ।


ତିନି ରଥେ ଚତୁର୍ଦ୍ଧାମୂର୍ତ୍ତି

ଝଲସଇ ଅପୂର୍ବ ଜ୍ୟୋତି ।


ତିନି ରଥ ଭାରି ସୁନ୍ଦର

ବଡ଼ ଦାଣ୍ଡେ ଭକ୍ତ ସମୁଦ୍ର ।


ରଥ ଦିଶେ ମନ୍ଦିର ପରି

ଭକ୍ତମାନେ ଥାଆନ୍ତି ଘେରି ‌।


ତାଳଧ୍ଵଜ ଦେବଦଳନ

ନନ୍ଦିଘୋଷେ ଚକାନୟନ ।


ଘଣ୍ଟଘଣ୍ଟା ଉଛୁଳେ ତୂରୀ

ପ୍ରଭୁ ବିଜେ ପହଣ୍ଡି କରି ।


ପୁଷ୍ପ ବୃଷ୍ଟି ସରଗୁ ହୁଏ

ବିଶ୍ବ ତୁମ ବନ୍ଦନା ଗାଏ ।


ପ୍ରଭୁଙ୍କର ପହଣ୍ଡି ଯେବେ

ଟାହିଆତ ମଥାରେ ଶୋଭେ ।


ବାଉଁଶ ରେ ଜରି ଜମ୍ବୁରା

ସୋଲ ଆଉ ଫୁଲର ଝରା ।


ତୁଳସୀ ଦୟଣା ରଙ୍ଗଣୀ

ଟାହିଆରେ ହୁଏ ମଣ୍ଡଣୀ ।


ପବନରେ ଦୋହଲୁଥାଏ

ଭକତଙ୍କ ମନକୁ ମୋହେ ।


ଧାଡି ପହଣ୍ଡିରେ ଠାକୁରେ

ଆସିଥାନ୍ତି ସିଂହ ଦୁଆରେ ।


ସୁଦର୍ଶନ ଆଗ ଆସନ୍ତି

ଦେବୀ ରଥେ ସେତ ବସନ୍ତି ।


ବଳଭଦ୍ର ପହଣ୍ଡି ବିଜେ

ବିରାଜନ୍ତି ସେ ତାଳଧ୍ଵଜେ ।


ଶୂନ୍ୟ ପହଣ୍ଡି ରେ ଶୁଭଦ୍ରା

ଦେବଦଳନ ରେ ସେ ଉଭା ।


ଶେଷରେ କଳିଆ ସାଆନ୍ତ

ଝୁଲି ଝୁଲି ଆସନ୍ତି ସେତ ।


ନନ୍ଦିଘୋଷ ପ୍ରଭୁଙ୍କ ରଥ

ଢଳିଢଳି ସେ ବିରାଜିତ ।


ତିନି ରଥରେ ଚାରି ମୂର୍ତ୍ତି

ଶୋଭା ସୁନ୍ଦର ଝଟକନ୍ତି ।


ଛେରାପହଁରା ତହିଁ ନୀତି

କରନ୍ତି ରାଜା ଗଜପତି ।


ପହ‍‍ଁରା ଧରି ଯେ ରାଜନ

କରନ୍ତି ରଥ ସମାର୍ଜନ ।


ଚନ୍ଦନ ପାଣି ଛିଞ୍ଚି ଥାନ୍ତି

ତାପରେ ଆଳତି କରନ୍ତି ‌।


ପକାଇ ଆଲଟ ଚାମର

ରାଜା କରନ୍ତି ନମସ୍କାର ।


ଛେରାପହଁରା ଗଲେ ସରି

ଗଜପତି ଯାଆନ୍ତି ଫେରି ।


ଚାରମାଳ ଫିଟା ଯାଏଟି

ଘୋଡ଼ା ସବୁ ଯୋଚା ହୁଏଟି ।


ରଥଟଣା ଆରମ୍ଭ ହୁଏ

ଘଣ୍ଟଘଣ୍ଟା ଉଛୁଳୁଥାଏ ।


ଡାହୁକ ଯେ ବେତ ହଲାନ୍ତି

ଭକ୍ତମାନେ ରଥ ଟାଣନ୍ତି ।


ଗଡିଯାଏ ରଥ ତିନୋଟି

ବଡ଼ଦାଣ୍ଡ ଧନ୍ୟ ହୁଏଟି ।


ଆଗ ଟଣା ତାଳଧ୍ଵଜ ଟି

ତାପରେ ଯେ ଦେବୀ ରଥଟି ।


ଶେଷେ ନନ୍ଦିଘୋଷ ଟଣାଯେ

ଟାଣିବାକୁ ଭକ୍ତ ବଣାଯେ ।


ଟାଣିବାକୁ ସୁଯୋଗ ମିଳେ

ନନ୍ଦିଘୋଷ ଭାଗ୍ୟରେ ଥିଲେ ।


ଶରଧା ବାଲି ତିନି ରଥ

ଜନ୍ମବେଦୀ ର ଲିଳା ସେତ ।


ଗୋଟି ପହଣ୍ଡି କରିଥାନ୍ତି

ଗୁଣ୍ଡିଚା ଘରେ ପ୍ରଭୁ ଯାନ୍ତି ।


ଗୁଣ୍ଡିଚା ମନ୍ଦିର ସୁନ୍ଦର

ଜନ୍ମବେଦୀ ଯେ ପ୍ରଭୁଙ୍କର ।


ଦାରୁବ୍ରହ୍ମ ଚତୁର୍ଦ୍ଧା ମୂର୍ତ୍ତୀ

ଏହିଠିରେ ଗଢା ହେଲେଟି ।


ବନ୍ଦ ରୁହେ ଏ ବର୍ଷ ସାରା

ରଥ ରେ ଲାଗଇ ଯାତରା ।


ଆଡ଼ପ ମଣ୍ଡପ ଯେ ତହିଁ

ବିଜେ କରନ୍ତି ପ୍ରଭୁ ଯହିଁ ।


ଆଡ଼ପ ଦର୍ଶନ ରେ ପୂଣ୍ୟ

ମନ ପ୍ରାଣ ଯେ ହୁଏ ଧନ୍ୟ ।


ଲକ୍ଷ୍ମୀ ତ ତେଣେ ଏକା ଥାନ୍ତି

ଗୁପ୍ତ ରାହାସ ହୁଏ ଏଠି ।


ଫେରନ୍ତି ନାହିଁ ପ୍ରଭୁ ଯେଣୁ

ରୋଷ କରନ୍ତି ମାତା ତେଣୁ ।


ହେରାପଞ୍ଚମୀ ରଜନୀ ରେ

ଆସନ୍ତି ସେ ଗୁଣ୍ଡିଚା ଘରେ ।


ପ୍ରଭୁଙ୍କୁ ପାରନ୍ତିନି ଭେଟି

ମଥାକୁ ରାଗ ଯାଏ ଉଠି ।


ନନ୍ଦିଘୋଷ ରୁ ଭାଙ୍ଗି କାଠ

ଦେଉଳେ ଫେରିଥାନ୍ତି ମାତ।


ମାତାଙ୍କ ରାଗ ଅଭିମାନ

ଜାଣିପାରନ୍ତି ନାରାୟଣ ।


ଫେରିବାକୁ ତହୁଁ ପ୍ରସ୍ତୁତ

ଦକ୍ଷିଣ ମୋଡ଼ ହୁଏ ରଥ ।


ବାହୁଡ଼ା ଦଶମୀ ତିଥିରେ

ପ୍ରଭୁ ଫେରନ୍ତି ଶ୍ରୀମନ୍ଦିରେ ।


ମାଉସୀ ମାଆ ଚାହିଁଥାନ୍ତି

ପୋଡ଼ ପିଠା ସେ ଖୋଇଥାନ୍ତି ।


ରାଜ ଉଆସ ଆଗେ ସେତ

ପ୍ରଭୁଙ୍କ ସାଥେ ଲକ୍ଷ୍ମୀ ଭେଟ ।


ସିଂହ ଦ୍ବାରେ ପହଞ୍ଚେ ରଥ

ପରଦିନ ସୁନା ବେଶତ ।


ସୁନା ଛାଉଣୀ ପ୍ରଭୁ ହୋଇ

ନିଅନ୍ତି ଭକ୍ତ ମନ ମୋହି ।


ରଥେ ପୁଣି ଅଧର ପଣା

ଅଶରୀରି ହୁଅନ୍ତି ବଣା ।


ପ୍ରଭୁଙ୍କ ସାଥେ ଯାଇଥାନ୍ତି

ପଣାରେ ହୁଏ ମନ ଶାନ୍ତି ।


ତାପରେ ତ ନୀଳାଦ୍ରି ବିଜେ

ଭକତିରେ ଭକତ ହଜେ ।


ନିଳାଦ୍ରୀ ବିଜେ ଯେଉଁ ଦିନ

ମହକଇ ଚୁଆ ଚନ୍ଦନ ।


ଗୋଟି ପହଣ୍ଡି ଦିଅଁ କରି

ଶ୍ରୀମନ୍ଦିରେ ଯାଆନ୍ତି ଫେରି ।


ଆଗ ଫେରନ୍ତି ସୁଦର୍ଶନ

ତାପରେ ବଳଭଦ୍ର ପୁଣ।


ଶୂନ୍ୟ ପହଣ୍ଡି କରି କରି

ଶୁଭଦ୍ରା ଯାଇଥାନ୍ତି ଫେରି ।


ଶେଷରେ ପ୍ରଭୁ ଯେ ଫେରନ୍ତି

ଗହଳୀ ଦାଣ୍ଡରେ ଲଗାନ୍ତି ।


ଚାରମାଳ କୁ ପ୍ରଭୁ ଆସି

ଦଣ୍ଡେ ରୁହନ୍ତି ତହିଁ ବସି ।


ଭେଟ ମଣ୍ଡପ ରେ କମଳା

ଚାରମାଳ ରେ ଚକାଡୋଳା।


ଚାରିଆଖି ହୁଏ ମିଳନ

ଆଳତି ତହୁଁ ଅରପଣ ।


ପହଣ୍ଡି ପ୍ରଭୁ କରିଥାନ୍ତି

ସିଂହଦ୍ବାର କୁ ଯାଇଥାନ୍ତି ।


ମାଆ ଯେ କବାଟ କିଳନ୍ତି

ପ୍ରଭୁଙ୍କ ବାଟ ଉଗାଳନ୍ତି ।


ମାନ ଅଭିମାନ ଚାଲେଟି

କଥା କଟାକଟି ହୁଏଟି ।


ପ୍ରଭୁଙ୍କର ମିଠା ବଚନ

କିଣିନିଏ ମାଆଙ୍କ ମନ ।


ରାଗ ଅଭିମାନ ତେଜିତ

ଖୋଲିଥାନ୍ତି ମାଆ କବାଟ।


ମନ୍ଦିର କୁ ପ୍ରଭୁ ଚଳନ୍ତି

ସିଂହାସନେ ବିଜେ କରନ୍ତି ।


ରତ୍ନବେଦୀ ହୁଅଇ ପୂର୍ଣ୍ଣ

ଆରସନେ ଚାହିଁଥା ମନ ।


Rate this content
Log in