ରଥେ ଡାକେ ଡାହୁକ
ରଥେ ଡାକେ ଡାହୁକ
ହୋ ଭଗତେ !
ରଥ ଯିବ ଗଡ଼ି ଗଡ଼ି,
ପାକଲା ଗାମୁଛା ମୁଣ୍ଡେ ପଗଡ଼ି,
ହାତେ ମୋ ନହକା ବାଡ଼ି ll
ହୋ ଭଗତେ !
ହରିବୋଲ ଦିଅ ଭକ୍ତେ,
ରଥରେ ବିଜୟ ଶ୍ରୀଜଗନ୍ନାଥେ,
ଭଦ୍ରା ହଳୀଙ୍କର ସାଥେ ll
ହୋ ଭଗତେ !
ଧୀରେ ଧୀରେ ନେବ ଭିଡ଼ି,
ହୁଳହୁଳି ଦେବ ମାଉସୀ ଖୁଡ଼ି,
ମେଘ ଦେଲା ଘଡ଼ ଘଡ଼ି ll
ହୋ ଭଗତେ !
ହିଡ଼ି ହିଡ଼ିକିଆ ବଣି,
ହିଡ଼ପରେ ଥାଇ ପିଅନ୍ତି ପାଣି,
କହିବ କି ଭକ୍ତ ଶ୍ରେଣୀ ll
ହୋ ଭଗତେ !
ମହାପ୍ରଭୁ ଜଗନ୍ନାଥ,
ସଖାପଣେ ପରା ଟାଣିଲେ ରଥ,
ଗୀତା ଶୁଣାଇଲେ ପାର୍ଥ ll
ହୋ ଭଗତେ !
ଶରୀରଟି ତୁମ୍ଭ ରଥ,
ସାରଥୀ ତାହାର ଜଗତ ନାଥ,
ଏ ସଂସାର ଯାତ୍ରା ପଥ ll
ହୋ ଭଗତେ !
ଗୋପକୁ ଅକ୍ରୁର ଗଲା,
ରାମ କୃଷ୍ଣ ନେତ୍ରେ କଜଳ ଦେଲା,
ମଥୁରା ଘେନି ଅଇଲା ll
ହୋ ଭଗତେ !
ବହିଲା ବାହା ଚଇତି,
କଳ୍କୀ ଅବତାର ଚତୁର୍ଦ୍ଧା ମୂର୍ତ୍ତୀ,
ଖଣ୍ଡା ତାଙ୍କ ବାରହାତି ll
ହୋ ଭଗତେ !
କାଞ୍ଚି ଯୁଦ୍ଧେ ପ୍ରଭୁ ଗଲେ,
ମାଣିକର ହାତୁ ଦହି ପିଇଲେ,
ଜୟଵାନା ଉଡ଼ାଇଲେ ll
ହୋ ଭଗତେ !
ବରିଲ ମୋତେ ସାରଥୀ,
ମହାସାରଥୀଙ୍କୁ କରେ ମୁଁ ଭକ୍ତି,
ହାତ ଯୋଡ଼ି ନେତି ନେତି ll
ହୋ ଭଗତେ !
ଆଷାଢ଼େ ପାଚିଲା ତାଳ,
ଗୁଣ୍ଡିଚା ବାଡ଼ିରେ ଭକ୍ତ ବତ୍ସଳ,
ଶ୍ରୀନନ୍ଦ ଯଶୋଦା ବାଳ ll
ହୋ ଭଗତେ !
ରଥଟଣା ହେଲା ଶେଷ,
ଏକଲା ଆସିଲେ ଶ୍ରୀଜଗଦୀଶ,
ଲକ୍ଷ୍ମୀ ହେଲେ ମହାରୋଷ ll
ହୋ ଭଗତେ !
ରଥ ଚାଲେ ଘୁଉଁ ଘୁଉଁ
ରଥ କହିଯାଏ ଦେବତା ମୁଁ ଲୋ
ପଥ କହୁଥାଏ ମୁଉଁ ll
ହୋ ଭଗତେ !
ଜଗତ ଜୀବନ ହରି ,
ଭକତେ ଶରଧା ତାଙ୍କର ଭାରି,
ଦୀନବନ୍ଧୁ ଦଇତାରୀ ll
ହୋ ଭଗତେ !
ନମଃ ନମଃ ଚକାଡୋଳା,
କେ ବର୍ଣ୍ଣି ପାରିବ ତାଙ୍କରି ଲୀଳା,
ରୂପ ତା' ତ୍ରିପଣ୍ଡ କଳା ll