ରାକ୍ଷୀ

ରାକ୍ଷୀ ଆମ ସାକ୍ଷୀ ପବିତ୍ର ବନ୍ଧନ 

ନୁହେଁ ଏ ରେଶମ ଡୋରି ।

ଭାଇ ଭଉଣୀଙ୍କ ସେନେହ ସରାଗ 

ରହିଛି ଏଥିରେ ଭରି ।୧।

ରକ୍ଷା ବନ୍ଧନ ଏ ଉତ୍ସବ ଆମର

ପୁରାତନ ଉତ୍କଳର ।

ପରମ୍ପରା ସଂସ୍କୃତି ବହନ କରି 

ରହିଛି ଚିର ଭାସ୍ୱର ।୨।

ଯହିଁ ଥାଉ ଭାଇ ରାକ୍ଷୀଟିଏ ବାନ୍ଧି 

ଭଉଣୀ ମନାସେ ଭଲ ।

ସୁଖରେ ରହିଲେ ଭାଇଟି ତାହାର 

ତାହା ପାଇଁ ସବୁ ଭଲ ।୩।

ସେନେହ ଶରଧା ଆଦରର ଡୋରି

ରେଶମୀ ରାକ୍ଷୀଟି ପରା ।

ଭାଇ ହାତେ ରାକ୍ଷୀ ବାନ୍ଧି ଭଉଣୀଟି

ହୋଇଥାଏ ଆତ୍ମହରା ।୪।

ଦାନବେନ୍ଦ୍ର ମହାବଳୀ ବାମନଙ୍କୁ 

ବାନ୍ଧିଥିଲେ ଯେଉଁ ଡୋରେ ।

ବାନ୍ଧିଛି ଭଉଣୀ ଭାଇକୁ ତାହାର 

ସେହି ବନ୍ଧନ ଡୋରରେ ।୫।

ସାରା ଜୀବନ ତା ଭଉଣୀ ସୁରକ୍ଷା 

କରିବ ଭାଇ ତାହାର ।

ଭଉଣୀର ରାକ୍ଷୀ ଭାଇକୁ ତାହାର 

ପ୍ରୀତିପୂର୍ଣ୍ଣ ଉପହାର ।୬।

ଭାଇ ଭଉଣୀଙ୍କୁ ଏକାତ୍ମ ଡୋରରେ 

ବନ୍ଧନ କରିଛି ରାକ୍ଷୀ ।

ଭଉଣୀର ଭାଇ ଭାଇର ଭଉଣୀ 

ରାକ୍ଷୀ ଅଛି ତାର ସାକ୍ଷୀ ।୭।

ଭାବର ବନ୍ଧନ ରାକ୍ଷୀଟି ଆମର

ଗଉରବ ପରମ୍ପରା ।

ବହନ କରିଛି ମହକରେ ତାର

ଅମୃତମୟ ଏ ଧରା ।୮।