ରାକ୍ଷୀ ବାନ୍ଧିଲି ରଖିବ ମାନ
ରାକ୍ଷୀ ବାନ୍ଧିଲି ରଖିବ ମାନ
ବରଷକେ ଥରେ ଆସିଛି ଏ ରାକ୍ଷୀ
ଭାଇ ଭଉଣୀଙ୍କ ପାଇଁ
ଭାଇର ହାତରେ ରାକ୍ଷୀ ବାନ୍ଧିବାକୁ
ଭଉଣୀଟି ଯାଏ ଧାଇଁ l
ଡୋରି ସିନା ଅଟେ ରେଶମୀ ସୁତାର
ସ୍ମୃତିଭରା ଏଇ ରାକ୍ଷୀ
ଭାଇ ଭଉଣୀଙ୍କ ପବିତ୍ର ବନ୍ଧନ
ଯୁଗ ଯୁଗର ସେ ସାକ୍ଷୀ l
ରାଗ ଅଭିମାନ ସବୁକିଛି ଭୁଲି
ଭଉଣୀ ଅନାଇ ଥାଏ
ଦୀପଟିଏ ଜାଳି ମଙ୍ଗଳ ମନାସେ
ବାନ୍ଧି ରାକ୍ଷୀ ସୁତାଟିଏ l
ଭଉଣୀଟି କହେ ରାକ୍ଷୀ ମୁଁ ବାନ୍ଧିଲି
ଭାଇ ହେ ତୁମରି ହାତେ
ଯେତେ ବାଧା ଆସୁ ରଖିବ ମୋ ମାନ
କଥା ଦିଅ ଭାଇ ମୋତେ l
ଦିଅ ନାହିଁ ପଛେ ଟଙ୍କା ସୁନା ମୋତେ
କରିବିନି ମନ ଉଣା
ସ୍ନେହ ଟିକେ ଦେଇ ଆପଣାଇ ନେଲେ
ସେ ହେବ ରାକ୍ଷୀ ପାଉଣା l
ରାକ୍ଷୀ ଛୁଇଁ ଭାଇ ଶପଥ କର ହେ
ବିପଦରେ ହେବ ଠିଆ
ଭାଇ ପାଇଁ ଭଗ୍ନୀ କେତେଯେ ଜରୁରୀ
ଦେଖୁ ଏ ସାରା ଦୁନିଆ l