ପୁନଃ ପ୍ରେମ

ଆଉଥରେ ଆସ ସେଇ ଠାଣି ନେଇ

ନାଚି ଉଠୁ ତନ ମନ

ଆଉଥରେ କୁଞ୍ଜ ସଜା ହୋଇଯାଉ

ବାଜି ଉଠୁ ବଂଶୀ ତାନ ।

ଆଉଥରେ ଶୁଭୁ ପାଉଁଜି ଶବଦ

ହୃଦ ବ୍ରଜରେ ପୁଣ୍ୟ ବାଲି

ଆଉଥରେ କୁଳ ଲଂଘି ଉଠୁ ପୁଣି

ଯମୁନାର ଜଳ ଉଛୁଳି ।

ଆଉଥରେ ଆଖି ଦେଖୁ ସେ ସପନ

ମିଳନର ରାସ ଖେଳ

ଆଉଥରେ ଦେହେ ଭରି ଯାଉ ତାତି

କାହ୍ନା ନାମେ ସଜୁ କଜଳ ।

ଆଉଥରେ ପୁଣି ଉଡୁ ସେଇ କାନି

ପୋଛି ଚାଲେ ନିତି ଲୋତକ

ଆଉଥରେ ରଙ୍ଗ ଭରିଯାଉ ପ୍ରଭୁ

ଅଙ୍ଗେ ଆଣି ଶତ ପୁଲକ ।

ଆଉଥରେ ନିଅ କୋଳେଇ ବାହୁରେ

ଅଧୀର ମନ ଆଜି ଝୁରେ

ଆଉଥରେ ରାଈ ସାଜିବାକୁ ସତେ

ଉଚ୍ଛନ୍ନ ହୁଏ ମୁଁ କାହ୍ନୁରେ ।

ଆଉଥରେ ଲୋଟି ତୁମରି ଛାତିରେ

ନିଜକୁ କରିବି ଧନ୍ୟ

ଆଉଥରେ ଏକ ହୋଇ ତୁମ ସହ

ଅଧୁରା ପ୍ରେମ ହେଉ ପୂର୍ଣ୍ଣ ।