ପ୍ରହେଳିକାମୟ

ସଂସାର ହାଟରେ ଆଜି କାଲି ଆଉ

କାହିଁ ନାହିଁ ଆତ୍ମିୟତା,

ଅସହାୟେ ଆଜି ସମ୍ପର୍କ କାନ୍ଦୁଛି

ଧର୍ମକୁ ଦାନ୍ତ ନିକୁଟା ।

ଦେଖିବାକୁ ଗଲେ ସମସ୍ତ ସମ୍ପର୍କ

ନିଜଠୁ ଅତି ନିଜର ,

ବାହାରକୁ ଖାଲି ଲୋକ ଦେଖାଣିଆ

ଭିତରଟା ସାତପର ।

ମୋହ ଆଉ ନାହିଁ ସବୁ କିଛି ମାୟା

ସ୍ବାର୍ଥ ସର୍ବସ୍ବ ଜୀବନ ,

ରାମ ନାମ ଖାଲି ତୁଣ୍ଡେ ଉଚ୍ଚାରିତ

ମରା ରେ' ଗୃହ ଶ୍ମଶାନ ।

କାରୁଣ୍ୟରେ ପୂର୍ଣ୍ଣ ଯନ୍ତ୍ରଣା ଜର୍ଜିତ

ଏହି ପରା କଳି କାଳ ,

ଘରଠୁ ବାହାର ଆତ୍ମୀୟ ସୋଦର

ପୁରା ମହାକାଳ ଫଳ ।

ମୁଁ ତ୍ଵ ମଧ୍ୟରେ ତ' ଆଜିର ସମ୍ପର୍କ

ଅଣନିଃଶ୍ୱାସି ହେଲାଣି ,

ସ୍ବାର୍ଥ ବିଜଡ଼ିତ କୁହୁଳା ସମ୍ପର୍କେ 

ମଧୁରତା ଲିଭିଲାଣି ।

ଆତ୍ମ ପ୍ରଚାରିତ ପ୍ରବଞ୍ଚନା ମଧ୍ୟେ

ଅତ୍ମିୟତା ଭାବ ନାହିଁ ,

ତୃପ୍ତି, ଶାନ୍ତି ପୂର୍ଣ୍ଣ ଯୋଗସୂତ୍ରେ ବନ୍ଧା

ପବିତ୍ର ସମ୍ପର୍କ କାହିଁଁ??

ପଥଭ୍ରଷ୍ଟ ପୂର୍ଣ୍ଣ ମାନସିକତାରେ

କଳୁଷିତ ହୃଦୟରେ ,

ମୂଲ୍ୟବୋଧ ହୀନ ଚିନ୍ତା ଚେତନାରେ

ପୀୟୂଷରେ ବିଷ ଭରେ ।

ଚାଟୁକାର ପୂର୍ଣ୍ଣ ଆତ୍ମୀୟତା ଭାବ

ପ୍ରହେଳିକାମୟ ଲାଗେ ,

ଋଗ୍ଣ ମାନସିକ ଆବଦ୍ଧ ଅଳନ୍ଧୁ

ଘରେ ଘରେ ଆଜି ଜାଗେ ।