ପ୍ରବୃତ୍ତିର ଅଭିସନ୍ଧି

ଜୀବନ ବୁଝେନି ଜୀବନକୁ ଏଠି 

ଅଜ୍ଞାନର ଅନ୍ଧକାରେ 

ପ୍ରବୃତ୍ତି ପ୍ରବଣ ନିଷ୍ଠୁର ପରାଏ 

ଅଭିସନ୍ଧି ସ୍ବାର୍ଥତାରେ ll

ପ୍ରକୃତି ପ୍ରବୃତ୍ତି ଭ୍ରମ କରେ ନିତି 

କର୍ତ୍ତବ୍ୟ ଦାୟିତ୍ୱବୋଧ 

ରକ୍ତ ନିଏ ଏଠି ନୃଶଂସ ପରାଏ 

ରକ୍ତର ପ୍ରତିଶୋଧ ll

କ୍ଷଣିକ ସୁଖର ମୂର୍ଖତାରେ ପୁଣି 

ପଶୁତ୍ବକୁ ଆଣେ ଡାକି 

ମାନବିକତାର ବିବେକକୁ ଏଠି 

ନିଲାମରେ ଦିଏ ବିକି ll

କର୍ମ ଅକର୍ମର ଧର୍ମ ଅଧର୍ମର 

ନଥାଏ ମନରେ ଭୟ 

ପ୍ରବୃତ୍ତି ପ୍ରମତ୍ତ ବୃଥା ଅହଂକାରେ 

ନିଜକୁ ହିଁ କରେ କ୍ଷୟ ll

କ୍ଷଣଭଙ୍ଗୁର ଏ ଜୀବନ ଅବଧି 

ଅସ୍ଥିର ଆଶଙ୍କା ଭରା 

ତଥାପି ଜୀବନ ହୁଅଇ ବିପନ୍ନ 

କାମନାରେ ପଡି ପରା ll

ରୋଗ ଶୋକ ଜରା ଗ୍ରସ୍ତ ଏ ଜୀବନ 

ଜଞ୍ଜାଳରେ ଯାଏ ଫସି 

ତଥାପି ଅନ୍ୟର ଅନିଷ୍ଟ ପରାଏ 

ଫାସ ଭିଡୁଥାଏ ବସି ll

କାହା କୃତ କର୍ମ କାହା ପାଇଁ ଏଠି 

ସଜା ପ୍ରାୟେ ହୁଏ କାଳ 

ଜୀବନ ସଂଗ୍ରାମେ କିଏ ଜିତେ ପୁଣି 

କିଏ ହୁଏ ଅସଫଳ ll

ନଷ୍ଟ ପ୍ରବୃତ୍ତିର ଭ୍ରଷ୍ଟ ଚରିତ୍ରରେ 

ବିକୃତ ପ୍ରମତ୍ତ ଚିତ୍ତ 

ଧୂର୍ତ୍ତ ଅଭିସନ୍ଧି ନଷ୍ଟ କରିତୋଳେ 

ଜୀବନର ସବୁ ହିତ ll