ପ୍ରାଣୀଙ୍କର ମିତ ହୁଅ
ପ୍ରାଣୀଙ୍କର ମିତ ହୁଅ
ଇଏ କି ଲଢେଇ କରୁଅଛ ଏଠି
ସିଏ ବି ଗୋଟିଏ ଜୀବ,
ତୁମ ଖୁସି ଲାଗି ଉସୁକାଅ ତାକୁ
ଲହୁ ଲୁହାଣ ସେ ହେବ ।
ବନ୍ଦ କର ବନ୍ଦ କର
ଈଶ୍ୱରଙ୍କ ଏଇ ପବିତ୍ର ସୃଷ୍ଟିରେ
ପ୍ରାଣୀ ହିଂସା ଘୃଣ୍ୟ ଚିର ।
ଜଙ୍ଗଲର ବାଘ ସିଂହ ମଧ୍ୟ କେବେ
ଅଯଥାରେ ଜୀବ ବଧ,
କରନ୍ତିନି ଖାଲି କ୍ଷୁଧା ନିବାରଣ
ଲାଗି ହୋଇଥା'ନ୍ତି ବାଧ୍ୟ ।
ତାଙ୍କ ଠାରୁ କିଛି ଶିଖ
ମଣିଷ ଜନମ ପାଇଛ ଧରାରେ
ଜୀବ ପ୍ରତି ଦୟା ରଖ ।
ଗୋଡ଼ରେ ତାହାର ଅସ୍ତ୍ର ବାନ୍ଧିଦେଇ
ତାଳି ମାରି ମଜା ନିଅ,
କୁକୁଡ଼ା ଲଢେଇ ଆଳେ ହେ ମଣିଷ
ପୈଶାଚିକ ଖୁସି ପାଅ ।
ଟିକେ ତ ସୁଧୁରିଯାଅ
ହିଂସା ଛାଡ଼ି ତାଙ୍କ କଲ୍ୟାଣ କରିକି
ପ୍ରାଣୀଙ୍କର ମିତ ହୁଅ ।