ପକ୍ଷୀ ସମ୍ମିଳନୀ

ବରଗଛ ଡାଳେ ଡାମରା ବସି,

                               ସଭା କରୁଥିଲେ ବିହଙ୍ଗ ମିଶି ।

ପାଖରେ ବସିଛି କଜଳପାତି,

                               କହଇ ଧରାରେ ବଢିଲା ତାତି।

ନଦୀ ନାଳ ସବୁ ଗଲାଣି ଶୁଖି,

                       ପାଣି ଟୋପେ ପାଇଁ ହେଉଛୁ ଦୁଃଖୀ ।

ନିଜ ଭବିଷ୍ୟ କୁ କରିଣ ମାଟି,

                                 ମଣିଷ ଗଛକୁ ଦେଉଛି କାଟି।

ବଣ ଜଙ୍ଗଲରେ ଲଗାଇ ନିଆଁ,

                                 ବାୟୁ ମଣ୍ଡଳକୁ କରଇ ଧୂଆଁ ।

କାରଖାନା ଧୂଆଁ ତାସାଥେ ମିଶି,

                               ଦୂଷିତ କରାଏ ଧରାକୁ ବେଶୀ।

ପ୍ରକୃତି ଯଦି କରିବ କୋପ,

                               ଜୀବ ଜଗତ ହୋଇବ ଲୋପ।

ବିବିଧ ରୋଗରେ ପାଇବେ କଷ୍ଟ,

                               ମାନବ ସମାଜ ହୋଇବ ନଷ୍ଟ ।

ପଶୁ ପକ୍ଷୀ ପାଇଁ ରହୁ ଉଦାର,

                                 ପ୍ରକୃତି ବଞ୍ଚାଇ ଗଢୁ ସଂସାର ।

ସବୁଜ ସୁନ୍ଦର ରହୁ ବସୁଧା,

                                   ଋତୁ ଚକ୍ରରେ ନପଡୁ ବାଧା।