ପଖିଆ

ଲକ୍ଷିଆ ଭାଇ ପଖିଆ ଖଣ୍ଡେ 

   ଝଅଟ ଯାଇ ଆଣ l

ବରଷା ହେବ ନାହାକ ପୁଅ 

   କହିଛି ସାତ ଦିନ ll

ଉଡ଼ି ବୁଲନ୍ତି ଝଡ଼ିଆ ପୋକ

  ବେଙ୍ଗ ଦେଲେଣି ରଡ଼ି l

ଘୋର ବରଷା ଆସୁଛି ମାଡ଼ି

   ସାଙ୍ଗରେ ଘଡ଼ଘଡ଼ି ll

ବରଷା ରାଜା ବଜାଏ ବାଜା 

  ବୁଲନ୍ତି ଦାଣ୍ଡେ ଜୋକ l

ଢାଳିବ ଶୁଣ୍ଢେ ଅଇରାବତ

  ବୁଡ଼ିବ ତୋର ଭେକ ll

ପୂରୁବ ଦିଗେ ପଡ଼ିଛି ଖଣ୍ଡି

   ଭସାଇ ଦେବ ହାଣ୍ଡି l

ରାତିରେ ତୋରା ପଡ଼ଇ ପରା

  ଆକାଶଗଙ୍ଗା ଦାଣ୍ଡି ll

ଶ୍ରାବଣ ମାସ ରୁଆ ବେଉସ

   ବସିବୁ କିମ୍ପା ଛାଡ଼ି l

ପଖିଆ ବିନା ଲାଗିବ ଯେବେ

   ମାସଟା ଯାକ ଝଡ଼ି ll

ପଖିଆ ସିନା ଲକ୍ଷିଆ ଭାଇ 

  ବାଆ ବତାସି ସାହା l

ଇନ୍ଦର ରାଜା ବାଜା ନ ବଜା 

   ଝଡ଼ି ବରଷା ଯାଆ ll

ପଖିଆ ମୁଣ୍ଡ ଅଖିଆ ତୁଣ୍ଡ

  ଧନ୍ୟରେ ଚଷାଭାଇ l

ସବୁରି ତୁଣ୍ଡେ ଆହାର ଗଣ୍ଡେ

  ଯୋଗାଇ ଦେଉ ତୁହି ll

ହେ ହଳଧର ବଡ଼ ଠାକୁର

  ପ୍ରଭୁ ହେ ଇଷ୍ଟ ମୋର l

ସଦୟ ହୁଅ ହେ ଦୟାମୟ

  ଚଷା ଭାଇକୁ ମୋର ll