ପାଇବିକି ଜଗନ୍ନାଥ
ପାଇବିକି ଜଗନ୍ନାଥ
ତୋ ପଥ ପଥରେ ପଥ ମୁଁ ଖୋଜୁଛି
ପାଉନାହିଁ ପ୍ରଭୁ ପଥ
ତୁମଠାରେ ଆଶା ରଖିଛି ଭରସା
ପାଇବିକି ଜଗନ୍ନାଥ ।
ତୋତେ ସୁମରିଲେ ଦୁଃଖ ଯାଏ ବୋଲି
ଡାକୁଛି କାଳିଆ ତୋତେ
ଅନ୍ତର କହୁଛି ଦୁଃଖ ଥାଉ ପଛେ
ଡାକୁଥିବି ଅବିରତେ ।
ତୋ ପଥ ପାଇବି ତୋତେ ମୁଁ ଭେଟିବି
ଆଶ୍ଵାସନା ଅନୁଶ୍ରୁତ
ଏତିକି ମୋ ଖୁସି ରହିଛି ଭରସି
ତୋର ଚିନ୍ତା ହେଉ ବ୍ରତ ।
ତୁମଠାରେ ଆଶା ରଖିଛି ଭରସା
ପାଇବିକି ଜଗନ୍ନାଥ ।
ଜାଣିନି ମୁଁ କେବେ ନିଦାଘ ମରୁରେ
ପାଇବି ଝରଣା ଜଳ
ବିଶ୍ଵାସ ମୋ ଅଛି ନିଶ୍ଵାସ ଦେଇଛ
ଦେଇଛ ମନରେ ବଳ ।
ଶେଷ ଶ୍ଵାସ ମୋର ଯିବ ତୋ ଡାକରେ
ଡାକୁଥିବି ଜଗନ୍ନାଥ
ଏତିକି କରୁଣା କରିତ ପାରିବ
ପାଇବାକୁ ତୋର ପଥ ।
ତୁମଠାରେ ଆଶା ରଖିଛି ଭରସା
ପାଇବିକି ଜଗନ୍ନାଥ ।