ଓଁ ଗୁରୁ ଦେବାୟ ନମ

ଦିବା ବିଭାବରୀ

ଡାକ ପ୍ରାଣ ଭରି

ଓଁ ଗୁରୁ ଦେବାୟ ନମ ।

ଯିବ ପାପ ତାପ

ପ୍ରାଣରୁ ସନ୍ତାପ

କଳି ନୁହେଁ ଗୁଣ ନାମ ।

ତରୁ ପତ୍ର ପ୍ରାନ୍ତେ

ନୀହାର ଲମ୍ବିତେ

ପତନେ ନାହିଁ ବିଳମ୍ବ ।

ପଦ୍ମ ପତ୍ରେ ଜଳ

ଜୀବନେ ଚଞ୍ଚଳ

ଏ ତ ଉଦାହୃତ ସମ ।

ଉଠ ଉଠ ଭାଇ

ଅଳସେ ନ ରହି

ଗାଅ ଗୁରୁଙ୍କର ନାମ ।

ଧରା ଯାଏ ଭାସି

ନାମ ରଶେ ହସି

ଲହରୀ ତୋଳି ତା ପ୍ରେମ ।

ସେ ନାମେ ତୁଟଇ

ବନ୍ଧନ ହେ ଭାଇ 

ନ ହୁଅ ତୁମେ ହେ ବାମ ।

ଦୁରେ ଯାଏ ମାୟା

ସ୍ତିରୀ , ଧନ ଯାହା

ଗୁରୁ ନାମ ଗୁଣ ଧାମ ।

ଏଡ଼େ ସୁମଧୁର

ନାମ ଗୁରୁ ଙ୍କର

ଜପୁ ହୃଦ ନିତ୍ୟ ମମ ।

ରୁଚି ରଖ ତହିଁ

ନିଷ୍କାମରେ ରହି

ଓଁ ଗୁରୁ ଦେବାୟ ନମ ।