ନର୍ତ୍ତକୀ ମୁଁ ସାଜିଛି

ନର୍ତ୍ତକୀ ମୁଁ ସାଜିଛି

     ଦୁନିଆଁର ରଙ୍ଗମଞ୍ଚେ

ତା, ତା , ଥେଈ ନାଚୁଛି ..

ପ୍ରବଞ୍ଚନା ଦୁନିଆଁରେ

     ପାଦ ଦୁଇ ଥାପିଛି,

ମୁଖେ ରଙ୍ଗ ମାଖି ହୋଇ

     ଘୁଙ୍ଗୁର ମୁଁ ପିନ୍ଧିଛି।

ତା,ତା, ଥେଈ ନାଚୁଛି

ନର୍ତ୍ତକୀ ମୁଁ ସାଜିଛି..

ରଙ୍ଗମଞ୍ଚ ରଙ୍ଗଶାଳେ

      ନାଚିବାକୁ ଆସିଛି ,

ରୁଣୁ ଝୁଣୁ ଘୁଙ୍ଗୁର ମୋ

      ଥିରି, ଥିରି ଶୁଭୁଛି ।

ଆଖି ଦୁଇ ବୁଜିଛି..

ନର୍ତ୍ତକୀ ମୁଁ ସାଜିଛି..

ବୟସର ଅପରାହ୍ନେ

       ମନ୍ଦ ମନ୍ଦ ହସୁଛି ,

ଘୁଙ୍ଗୁର ରହିବ ଦିନେ

       ଏହି କଥା ଭାବୁଛି ।

ଆଖି ଦୁଇ ବୁଜିଛି..

ନର୍ତ୍ତକୀ ମୁଁ ସାଜିଛି..

ମୂର୍ଚ୍ଛନାର ତାଳେ ତାଳେ

     ପାଗଳିନୀ ସାଜିଛି ,

ନିର୍ଲଜ ଘୁଙ୍ଗୁର ପୁଣି

      ଚୁପି ଚୁପି ବାଜୁଛି।

ଫେଣ୍ଟା, ଫେଣ୍ଟି ଯେତେ ରଙ୍ଗ

      ଦେହେ ବୋଳି ହୋଇଛି ,

ପାଦର ଅଳତା ରଙ୍ଗ

      ବେଶ୍ ଗାଢ଼ା ଦିଶୁଛି ।

ଆଖିରେ ମୁଁ ଦେଖୁଛି..

ନର୍ତ୍ତକୀ ମୁଁ ସାଜିଛି..

ପେନ୍ଥା ପେନ୍ଥା ଘୁଙ୍ଗୁର ମୋ

      କୁଷ୍ଣମୟ ହୋଇଛି ,

ପାଗଳିନୀ ରାଈ ଆଜି

      ବଂଶୀର ଧ୍ଵନି ପାଇଁ 

             କାନ ଡେରି ଶୁଣୁଛି..

ବସନ୍ତ ବଣରେ ଆଜି

       ଏକା ଏକା ବୁଲୁଛି ,

ଦୁନିଆଁ ଆଜି କହୁଛି

       ମିଛେ ବାଇ ହେଉଛି ।

ଆଖି ଦୁଇ ବୁଜିଛି..

ନର୍ତ୍ତକୀ ମୁଁ ସାଜିଛି..

ଯେତେ ନିନ୍ଦା ଅପମାନ

       ସବୁ ସହି ନାଚୁଛି ,

ନର୍ତ୍ତକୀ ମୁଁ ସାଜିଚି..

     ସବୁ ଯୁଗ ଜନ୍ମ ପାଇଁ

ଘୁଙ୍ଗୁର ମୁଁ ପିନ୍ଧିଛି..

ରଙ୍ଗ ଭିଜା ପୟର ମୋ

ଘୁଙ୍ଗୁର କୁ ଦେଖୁଛି..

ନର୍ତ୍ତକୀ ମୁଁ ସାଜିଛି ......