Library
Profile
ନୀରବତା
ନୀରବତା
ନୀରବତା ଅଟେ ଏମିତି ମନ୍ତ୍ରଟେ
ଉଚ୍ଚାରଣ କଲେ ମନ ପବିତ୍ର
ବାହାରେ ଭିତରେ ନିରବି ପାରିଲେ
ଶାନ୍ତି ମନ୍ଦିର ଟେ ହୁଏ ନିର୍ମିତ |
ନୀରବତା ଅଟେ ଏମିତି ବାର୍ତ୍ତାଟେ
ନ କହି ଅନେକ କଥା ଯେ କହେ
ଅଶାନ୍ତିରୁ ଆଣି ଶାନ୍ତି ସଉଧରେ
ଆମକୁ ସିଏ ଯେ ବସାଇ ଦିଏ ।
ନୀରବତା ଅଟେ ଏମିତି ସାଧନା
ଧଇର୍ଯ୍ୟ ତାହାର ସବଳ ପିଣ୍ଡ
ସକାରାତ୍ମକ ର ମୂଳଦୁଆ ପରେ
ନୀରବତା ଜିତେ ସାରା ବ୍ରହ୍ମାଣ୍ଡ |
ନୀରବତା ଅଟେ ଏମିତି ଗୀତ ଟେ
ନିଃଶଦ୍ଦରେ ମନ ନିଅଇ କିଣି
ଅନ୍ତର ଭିତରେ ଆତ୍ମା ସଙ୍ଗତରେ
ସଂପର୍କକୁ ସିଏ ପାରଇ ଜିଣି ।
ଅନନ୍ତ ଆକାଶ, ବିଶାଳ ସାଗର
ଧରିତ୍ରୀ ର ସେଇ ମୁଗ୍ଧ ମୌନତା
ସବୁଜ ବନାନୀ ବିମୁଗ୍ଧ ଚାନ୍ଦିନୀ
ନୀରବେ କୁହଇ ଶାନ୍ତି ର କଥା |
ନୀରବତା ଅଟେ ଏମିତି ଅସ୍ତ୍ରଟେ
ହିଂସା ଓ ଦ୍ଵେଷ କୁ ସହଜେ ମାରେ
କ୍ରୋଧ ବଶ କରି ଧଇର୍ଯ୍ୟ ସାଉଁଟି
ମନୋବଳ ଦୃଢ କରି ଯେ ଥାଏ |
ନୀରବତା ଅଟେ ସମ୍ମୋହନ ଶକ୍ତି
ଦିଶାରେ ଭରଇ ସୁବାର୍ତ୍ତା କେତେ
ନିଃଶବ୍ଦ ଧ୍ବନୀରେ ଅନ୍ୟ ମନ ପରେ
ପ୍ରଭାବ ବିସ୍ତାରୀ ଖୁସୀ ରେ ମାତେ |
ନୀରବ ରାତ୍ରୀ ଟି କ୍ଳାନ୍ତି ଦୂରକରେ
ଶାନ୍ତିରେ ନିଜକୁ ନିମଗ୍ନେ ଖୋଜେ
ନୀରବ ରାତ୍ରୀର ସୁନୀଳ ଆକାଶ
ମନ ସାଜେ କେତେ ଶବ୍ଦର ପୁଞ୍
ଜେ ।
ନୀରବ ଆକାଶେ ନୀରବ ଜହ୍ନଟା
ଶୀତଳ କିରଣ ଢ଼ାଳୁ ଯେ ଥାଏ
ନୀରବ ଆକାଶ ତାରା ଫୁଲ ରାଜି
ମନରେ ଆନନ୍ଦ ସଦା ଜଗାଏ ।
ନୀରବତା ଦିଏ ସାଧନାରେ ସିଦ୍ଧି
ଆତ୍ମ ବିଶ୍ଳେଷଣ ତାହାର ଗୁଣ
ନୀରବ ତପସ୍ୟା ଗର୍ଭରୁ ଆରମ୍ଭ
ନୀରବିଗଲେ ଯେ ପାଏ ମରଣ ।
ନୀରବତା ଅଟେ ଏମିତିକା ଜ୍ଞାନ
ମନସ୍ତତ୍ତ୍ୱ ପଢ଼ିପାରେ ସହଜେ
ସ୍ଥିତପ୍ରଜ୍ଞତା ରେ ନିଜକୁ ସଜାଏ
ଅନ୍ତଃର୍ମନେ ଶୁଭ ଶଂଖ ଯେ ବାଜେ ।
ନୀରବତା ଅଟେ ଏମିତି ମିତ୍ରଟେ
ସମାଧାନ ରାସ୍ତା ବତାଇ ଦିଏ
କଳି,ତକରାଳ ଦୂରରେ ରହି ଯେ
ଶାନ୍ତି ର ଶେଯରେ ଶୁଆଏ ସିଏ |
ନାରବତା ଅଟେ ଏମିତି ଶକ୍ତି ଟେ
ପାହାଡ଼ ଠାରୁ ଯେ ଅଟଇ ଶକ୍ତ
ଗଭୀରତା ତାର ମାପି ହୁଏ ନାହିଁ
ସିଏ ଯେ ମୋହ ରୁ କରଇ ମୁକ୍ତ ।
ନୀରବତା କରେ ଶାନ୍ତି ଆବାହନ
ନିଜ ଗୁଣେ ନିଜେ ହୁଅଇ ମୁଗ୍ଧ
ଅନ୍ୟର ନିରବ ଭାଷାକୁ ବୁଝଇ
ମନ ଓ ହୃଦୟ ହୁଅଇ ଶୁଦ୍ଧ ।
ହେଲେ ସବୁ କ୍ଷେତ୍ରେ ନୀରବ ରହିଲେ
ଅନ୍ୟାୟ ତାହାର କାୟା ବିସ୍ତାରେ
ଦୋଷୀ ଦୋଷୀ ଲାଗେ ମନ ଓ ହୃଦୟ
ଜୀବନ ରହଇ ଅଶାନ୍ତି ଘେରେ |
ନୀରବତା ହେଉ ଶାନ୍ତି ଆବାହକ
ଶୁଣୁ ଥାଉ ସିଏ ଆତ୍ମାର ଡାକ
ବିବେକକୁ ସାଥେ ନେଇ କରୁଥାଉ
ସୁନ୍ଦର ତପସ୍ୟା ଜୀବନ ଯାକ |
