ନୀଳଚକ୍ର

ନୀଳଚକ୍ର ବାନା ଦିଶେ କେଡ଼େ ସୁନ୍ଦର

 ଜଗନ୍ନାଥ ପରି କିଏ ଅଛି ଠାକୁର 

ତା ବଡ଼ ଦେଉଳ

ନାଁ ଶିରୀ ମନ୍ଦିର ।

ତା ବଡ଼ ଦାଣ୍ଡ ଧୂଳି ମୁଣ୍ଡେ ବୋଳିଲେ

କଳା ଶ୍ରୀ ମୁଖକୁ ତା ଡୋଳେ ଦେଖିଲେ

ନିମିଷକେ ପାପତାପ

ହୋଇଯାଏ ଦୂର ।

ତା ବଡ଼ ଦେଉଳ ନାଁ ଶିରୀ ମନ୍ଦିର--

ତା ମହାପ୍ରସାଦ ଅନ୍ନ କଣେ ପାଇଲେ

ଟଙ୍କ ତୋରାଣିପାଣିରୁ ମୁନ୍ଦେ ପିଇଲେ

ମେଣ୍ଟିଯାଏ ଭୋକଶୋଷ ସାତ ଜନ୍ମର

କୈବଲ୍ୟ ମୁକତି ନାମ ବୈକୁଣ୍ଠ ପୁର ।

ତା ବଡ଼ ଦେଉଳ ନାଁ ଶିରୀ ମନ୍ଦିର---

ଭାରତ ମୋ ସ୍ୱର୍ଣ୍ଣପ୍ରସୂ ଭୂସ୍ୱର୍ଗ ଉତ୍କଳ

ଶ୍ରୀ ପୁରୁଷୋତ୍ତମ ଶଙ୍ଖ ନାଭି ମଣ୍ଡଳ

ଚତୁର୍ଦ୍ଧା ମୂରତି ବିଜେ ସ୍ୱୟଂ ଦାରୁବ୍ରହ୍ମ

ଭକତି ମୁକତି ଦ୍ୱାର ମୋ ସ୍ୱର୍ଗ ଦୁଆର ।

ତା ବଡ଼ ଦେଉଳ ନାଁ ଶିରୀ ମନ୍ଦିର---

   ---------