ନିଃସଙ୍ଗତା

ନିଃସଙ୍ଗତା ଭାରି ବାଧେ

ଡାକେ ଯେବେ କୋଇଲି

ବଉଳର ବାସ୍ନା

ଫେଇ ଯାଏ ଅଙ୍ଗନୁ ଗଗନ

ବନସ୍ତ ଧରାରେ ବିଞ୍ଚି ଦିଏ

ଶିରି ଶିରି ଦକ୍ଷିଣା ପବନ।

ନିଃସଙ୍ଗତା ଭାରି ବାଧେ

ଆକାଶ ବୁକୁ ଚିରି

ଫାଜିଲାମୀ ହସ ଯେବେ

ହସଇ ଫୁଲେଇ ଜହ୍ନଟା

ଅଭିସାରିକା ସାଜି ରାତି

ପାଦ ଚିପି ଚାଲୁଥାଏ ଗାଁ ଦାଣ୍ଡରେ।

ନିଃସଙ୍ଗତା ଭାରି ବାଧେ

ପାର୍କର ନିଛାଟିଆ ଗଛ ମୂଳେ

ଶୁଭେ ଯେବେ ଚାପା ହସ

ଆଖିର ଇଙ୍ଗିତ

ପ୍ରେମ ପକ୍ଷୀ ହଳେ ଙ୍କର।

ନିଃସଙ୍ଗତା ଭାରି ବାଧେ

ଅକସ୍ମାତ ବସା ଭାଙ୍ଗି

ଅଫେରା ରାଇଜେ ଉଡିଯାଇଥିବା

କପୋତ ର କପୋତୀକୁ ଦେଖି

ଲୁହ ଆଉ କୋହ ମିଶି

ଯେଉଁଠି ଗାଆନ୍ତି

କରୁଣ ସ୍ୱରଟେ।

ହାଥ ଥମି ଯାଇଥାଏ

ସବୁ ଆଶା ଆକାଂକ୍ଷାର ବାତ୍ୟା

ଲିଭି ଯାଇଥାଏ ନାଲି ରଙ୍ଗ

ଲଙ୍ଗଳା ହାତ ,ମଥା ଯହିଁ

ବାହୁନନ୍ତି ଗୁମୁରି ଗୁମୁରି

ହସ ଯହିଁ ରଂଗଛଡ଼ା କାନ୍ଥ ପରି

ଦିଅନ୍ତି ବିକଳାଙ୍ଗ।