ନିଦରେ

ଫୁଲ ଯାଚୁଥିଲା ପୀରତି ରଂଗୋଲି ପ୍ରେମିକ ଭ୍ରମର ନିଦରେ

ରକ୍ତ ଜୁଡୁବୁଡୁ କୁଆଁରୀ ସପନ କିଏ ସେ ଦେଖିବ ନିଦରେ..!!୧!!

କେତେ ମୁଁ ଖୋଜିଲି ପଂକ୍ତି ପାଖୁଡ଼ାରେ ତୁମେ ଶୋଇଥିଲ ନିଦରେ

ବାଢୁଥିବ ଦିନେ ଅଶ୍ରୁ ତର୍ପଣ ମୁଁ ଶୋଇଯିବି ନିଦରେ..!!୨!!

ଟୋପିବାଲା ଯେତେ ଗୋପୀ ବାଳା ସଂଗେ ବଂଶୀ ବାହିଲେଣି ନିଦରେ

ଉଛୁଳି ଗଲାଣି ଯମୁନା ଦ୍ୱି-କୂଳ ଆହାଃ କୂଳବାସୀ ନିଦରେ..!!୩!!

ନକହିଲେ କିବା ପହଡ଼ ଭାଙ୍ଗିବ ମଣିମା ଅଚିନ୍ତ୍ୟ ନିଦରେ 

କିଏ ସେ ଡାକିବ କାଠଗଡ଼ାକୁ ଯେ' ସଭିଏଁ ଆପଣା ନିଦରେ..!!୦୪!!

ଦେଖ ସାୟଂକାଳ ହେ' ସୁପ୍ତ ପଥିକ ଆଲୋକ ଅନ୍ଧାର ନିଦରେ

କହୁଥିଲ ପରା ପୂଣ୍ୟ ଚେଇଁଛି ଘୁଙ୍ଗୁଡ଼ି ମାରେ ଯେ' ନିଦରେ..!!୦୫!!

ଶବ୍ଦ ପଥିକ ନିଃଶବ୍ଦ ମୁଣ୍ଡେଇ ମୁଣ୍ଡ ଗୁଞ୍ଜିଲେଣି ନିଦରେ

ଆସ ଏବେ ଆମେ କବିତା ବୁଣିବା କବି ଶୋଇଥାନ୍ତୁ ନିଦରେ..!!୦୬!!