ନିଆଁ ଆଉ ପାଣିର କଥା (ଚଲାପଥ)
ନିଆଁ ଆଉ ପାଣିର କଥା (ଚଲାପଥ)
ଜୀବନର ରଫ୍ ଖାତାରେ ଲେଖୁଛି
ତୁମର ମୋର ଅବୁଝା କାହାଣୀ,
ତୁମେ ଚାହିଁଥିଲ ନିଆଁ ହେବାପାଇଁ
କିନ୍ତୁ ମୁଁ 'ତ ହୋଇଗଲି ଯେ ପାଣି।
ଜୀବନ ଗଣିତ ସବୁ ହିସାବଟା
ହୋଇଗଲା ସେ,ଫନ୍ଦା ବୁଢିଆଣୀ
ତୁମେ ଚାହୁଁଥିଲ ଉଷ୍ମତା କେବଳ
ଜୀବନ ନିଆଁକୁ ଉଖାରି ଟାଣି ।
ମୁଁ ତ, ଚାହୁଁଥିଲି କାମନା, ବାସନା
ଦହନ ନିଆଁର ସେ ପରକାଶେ
ତୁଳସୀ ଚଉଁରା ସଞ୍ଜବତୀ ହୋଇ
ଜାଳନ୍ତି "ଆକାଶ ଦୀପ" ମୁଁ ଶେଷେ ।
ପ୍ରାଣ ପକ୍ଷୀ ଯଦି ଉଡ଼ିଯାଏ ଦୂରେ
ସେ ଆସେନା ଆଉ ପିଣ୍ଡକୁ ଫେରି,
ତୁମର ମୋର ଯା କହିବାର ଥିଲା
ମୁଖରେ ନକହି ଲୁହରେ ଭରି।
ପାଣି ହୋଇଯାଇ ବହୁଛି ଗଣ୍ଡରେ
ନିସ୍ତବ୍ଧତା ଦୀର୍ଘ ନିଃଶ୍ୱାସ ଭରି ,
ଭିତରେ ପ୍ରଳୟ ବାହାରେ ନିର୍ଜୀବ
ତୁମ ପଳାତକ ସ୍ମୃତି ଉଖାରି ।
ଦିଶା ବିହୀନ ମୁଁ ଆକୃତି ବିହୀନ
ଆଜିବି ଏବେ ବି ମୁଁ ,ପାଣି ପରି,
କ୍ଷୀର ସଙ୍ଗେ ନୀର ହେବା ପାଇଁ ଆଶା
ବହୁଛି ଶାନ୍ତିର ଇଚ୍ଛାକୁ ଧରି ।