ନେବି ଶପଥ
ନେବି ଶପଥ
ଆସିଛିରେ ପୁଣି ନୂଆ ବରଷ ,
ସେଥିଲାଗି ମନ ଭାରି ହରଷ ।
ରାଗ ରୁଷା ଯେତେ ମନରୁ ଭୁଲି ,
ସାଥୀଙ୍କ ସହିତ ଏକାଠି ମିଳି ।
ଏ ନୂଆ ବରଷେ ନେବି ଶପଥ ,
କରିବାକୁ ଦେଶ ଜାତିର ହିତ ।
ସରଗଠୁଁ ବଡ଼ ଜନମ ମାଟି ,
ଭୁଲିଯିବି ନାହିଁ ଏଇ କଥାଟି ।
ଗୁରୁଜନେ ଭକ୍ତି ଲଘୁଙ୍କୁ ସ୍ନେହ ,
କରୁଥିବି ସଦା ନ କରି ଭୟ ।
ଦୁଃଖୀଜନ ଦେଖି ଦୟା କରିବି,
ଭୋକିଲା ତୁଣ୍ଡରେ ଆହାର ଦେବି ।
ଭେଦଭାବ ମନେ ରଖିବି ନାହିଁ ,
ଆମେ ଯେତେ ସବୁ ଭଉଣୀ ଭାଇ ।
ଆମ ସଭିଙ୍କର ଗୋଟିଏ ମାଆ ,
ଅରି ଯାଏ ଡରି ଶୁଣି ତା' ନାଆଁ ।
ଗୁଣ ଗୌରବ ଯା' ସଦା ଉତ୍କର୍ଷ ,
ସେହି ମୋର ମାଆ ଭାରତବର୍ଷ ।
ଆଜିଠୁ ରହିଲା ଗୋଟିଏ ଲକ୍ଷ୍ୟ ,
ରଖିବାକୁ ଏଇ ମାଆର ଟେକ ।
ମୁହିଁ ଏ ମାଟିର ଏକ ସନ୍ତାନ ,
ତା' କୋଳରେ ଜନ୍ମି ହୋଇଛି ଧନ୍ୟ ।
ଆନନ୍ଦରେ ତା'ର କରିଲେ ସେବା ,
ସାର୍ଥକ ହୋଇବ ମଣିଷ ହେବା ।