ନାରୀ
ନାରୀ
ସୃଷ୍ଟିର ସମ୍ଭାର ଶକ୍ତିର ଭଣ୍ଡାର ନାରୀ ତୁମେ ନାରାୟଣୀ,
ଅନ୍ତରେ ଭରିଛି ଅମାପ ଶକତି ସେନେହ ଅଜସ୍ର ପୁଣି |୧|
ସୁନ୍ଦର ସୃଷ୍ଟିର ଅନିନ୍ଦ୍ୟ ପସରା ଉଷାର ପହିଲି ରଶ୍ମୀ,
କୋମଳ ପରଶ ଲାଗଇ ସରସ ଢାଳିଦିଏ ଯେହ୍ନେ ଶଶୀ |୨|
ରତନ ଗରଭା ବସୁନ୍ଧରା ମାତା ସହନ ଶକ୍ତି ଅପାର,
ନାରୀ ରୂପେ ତୁମେ ଧରଣୀ ସମଲୋ ସାରା ବିଶ୍ବରୂପ ସାର | ୩|
ନାରୀ ଅଟେ ମାତା ଭଗିନୀ ଦୁହିତା ଏକ ରୂପରେ ଅନେକ ,
ଜାୟା ପ୍ରଣୟିନୀ ଶୁଭ ପ୍ରଦାୟିନୀ ଭିନ୍ନ ଭିନ୍ନ ରୂପଶ୍ଳୋକ |୪|
ଦୁର୍ଗାର ଶକତି ବହିଛୁ ଶରୀରେ ଜ୍ଞାନରୂପେ ସରସ୍ବତୀ,
ଶକ୍ତି ସ୍ବରୂପିଣୀ ନାରୀ ସୁହାଶିନୀ ଶକ୍ତିମୟୀ ପାରବତୀ | ୫|
ବୀଣା ଜିଣା କଣ୍ଠେ ଗାଇଦେ ସୁକଣ୍ଠେ ଜଗତର ଶୁଭଗୀତି,
ସେ ଗୀତି ସୌରଭେ ଗାଇବ ଗୌରବେ ଭରିଯିବ ମୈତ୍ରି ପ୍ରୀତି |୬|
ଅମୀୟ ବରଷି ଭରିଦେ ସୁହାଶୀ ଆଶିଷର ବାରିଧାରା ,
ସେ ଅମୃତ ଧାରେ ଭିଜି ଯାଉ ଥରେ ବିଶ୍ବଜନ ଭାବଧାରା |୭|
ଚାମଣ୍ଡା ରୂପରେ ହରିନେ କଷଣ ଦୂରହେଉ ରୋଗଦୁଃଖ,
ପାପତାପ ଯେତେ ତୋହରି ପ୍ରସାଦେ ନମାଡ଼ିବ ଆଉ ପାଖ | ୮|
ସୁନ୍ଦର ସମାଜ ତୋହରି ତ ଦାନ ଭରିଦେବୁ ଶାନ୍ତି ପ୍ରୀତି,
କଳୁଶ କାଳିମା ଚାଲିଯାଉ ଥରେ ବସିଯାଉ ସ୍ନେହପ୍ରୀତି |୯|
ଏ ଦୁନିଆଁ ଗାଉ ଜୟ ନାରୀଶକ୍ତି ଜୟ ଜୟ ପୂଜ୍ୟ ମାତା,
ସଂସାର ହସିବ ଦୁନିଆଁ ଜିତିବ ନାରୀହିଁ ଜଗତଜୀତା |୧୦|