ମୁଠାଏ ଭାତ
ମୁଠାଏ ଭାତ
ମୁଠାଏ ଭାତରେ ମୁଠାଏ ଭାତ
ଭାତ ମୁଠା ପାଇଁ ପର ଘରେ ନିତି
ଭୋକ ବିକଳରେ ପାତୁଛୁ ହାତ
କଅଁଳ ବୟସେ କାମ କରୁକରୁ
ସମୟ ମାରଇ ଆମକୁ ନାତ
ମୁଠାଏ ଭାତରେ ମୁଠାଏ ଭାତ ।
ପଢିବା ଲେଖିବା ଶିଖିଲୁ ନାହିଁ
କଣ୍ଢେଇ ଖେଳନା ଦେଖିଲୁ ନାହିଁ
ସିଲଟ ଖଡିରେ ଲେଖିଲୁ ନାହିଁ
ଭଲମନ୍ଦ କିଛି ଚାଖିଲୁ ନାହିଁ
ଏନ୍ତୁଡିଶାଳରୁ ଲୁହରେ ଭାସୁଛୁ
ପାଉନି ଆହୁଲା ପାଉନି କାତ
ମୁଠାଏ ଭାତରେ ମୁଠାଏ ଭାତ ।
ଛାଇ ଆମପାଇଁ ସାତ ସପନ
କାହାଣୀ ଆମର ରହେ ଗୋପନ
ବଇଶାଖୀ ତାତି ଆମ ଜୀବନ
ନିଃଶ୍ୱାସରେ ଆମ ବିଷ ପବନ
ଆଖିରୁ ଶୁଖୁନି ଧାରା ଶିରାବଣ
ପେଟ ପାଇଁ ଆମେ ସହୁଛୁ ବେତ
ମୁଠାଏ ଭାତରେ ମୁଠାଏ ଭାତ ।
କଅଁଳ ବଅସ କଅଁଳ କଢି
ଫୁଟିବା ଆଗରୁ ଯାଉଛୁ ଝଡି
ସବୁ ଦିନ ଆମ ବରଷା ବଢି
ଜୀଇବା ପାଇଁକି ମରୁଛୁ ସଢି
ପଡ଼ିଉଠି ଆମେ ଚାଲୁଛୁ ନିଇତି
ଆଖି ପାଉନାହିଁ ଅମଡାବାଟ
ମୁଠାଏ ଭାତରେ ମୁଠାଏ ଭାତ ।