ମୋ ପ୍ରେମିକା - ୧
ମୋ ପ୍ରେମିକା - ୧
ନଈପଠା ଧାର ଆମ୍ବତୋଟା ମାଳ
ଚାନ୍ଦିନୀ ଗାଧୁଆ ରାତି
ପ୍ରେମିକା ମୋହର ପ୍ରତୀକ୍ଷା କରଇ
ପରଶି ଦେବାକୁ ପ୍ରୀତି ।
ପ୍ରେମିକା ମୋହର ଅତି ଲାଜକୁଳୀ
ଆଖିରେ କାହାଣୀ ଲେଖା
କଥା ମଧୁ ବୋଳା ହସ ପ୍ରିତୀ ଝରା
ଚାଲିରେ ତା' ମାଦକତା ।
ପ୍ରେମିକା ମୋହର ଅପସରୀ ନୁହେଁ
ନିଷ୍ପାପ ମଣିଷଟିଏ
ସରଳ ଚାହାଣୀ ମନ ନିଏ କିଣି
ସରଳତା ମନ ମୋହେ ।
ପ୍ରେମିକା ମୋହର ସୁନ୍ଦର ଫୁଲଟେ
ସୁଗନ୍ଧ ବିତରୁ ଥାଏ
ତା' ଚାରିପଟରେ ପ୍ରେମ ବର୍ଷା କରି
ସଭିଙ୍କୁ ଖୁସୀ ବିତରେ ।
ମୋ ପାଇଁ ଜାଳୁଛି ପ୍ରେମ ଦିପାଳୀ ସେ
ସାହସ ସଂଗ୍ରହେ ବ୍ୟସ୍ତ
ପିତା ମାତାଙ୍କର ଆଶୀର୍ବାଦ ବିନା
ଧରିବନି ମୋର ହାତ ।
ମନ ତା' ପବିତ୍ର ହୃଦୟ ବିରାଟ
ଆଶାର ଦିପାଳୀ ଜାଳେ
ଅପେକ୍ଷା କରିଛି ସେଇ ଦିନଟିକୁ
କେବେ ଆସିବ ମୋ ଘରେ ।
ଶଙ୍ଖା ସିନ୍ଦୂର ମୁଁ ସାଇତି ରଖିଛି
ତା' ବାଟକୁ ଚାହିଁ ଅଛି
ଭାବନାକୁ ତା'ର ସମ୍ମାନ ଦେଇ ମୁଁ
ପ୍ରତୀକ୍ଷା କରି ବସିଛି ।