ମୋ ଗାଁ ପୋଖରୀ

ମୋ ଗାଁ ପୋଖରୀ ଦିଶଇ ବଢିଆ

ଧାଡ଼ି ଧାଡ଼ି ଗଛ ଠିଆ ନଡ଼ିଆ 

ଥିରି ଥିରି ଜଳ ସ୍ଵଚ୍ଛ ନିରିମଳ

ହୁଏ କୁନି ଢେଉ ବହିଲେ ବାଆ । ୧।

ସତେକି ହସୁଛି ଖିଲି ଖିଲି କଇଁ

ପବନ ଦୋଳିରେ ହଲେ ଶରୀର

ପଦୁଅଁ ଫୁଲଟି ଖୁସିରେ ବିଭୋର

କିରଣ ପରସ ପାଇ ସୂର୍ଯ୍ୟର । ୨

ଯୋଡି ହଂସ କେଳି ବୁଡେ ହଂସରାଳି

ବୋଇତ ପରାଏ ଦୂରୁ ଦିଶଇ

ମାଛରଙ୍କା ଡେଣା ଝାଡ଼ି ଆକାଶରେ

ଖାଦ୍ୟ ପାଇଁ ସିଏ ଜଳେ ବୁଡ଼ଇ ।୩।

ସକାଳୁଆ ତୁଠ ଦିଶେ ଭରପୁର

ଆଲୋଚନା ଚାଲେ ବାସି ଖବର

ସାବୁନ୍ ତେଲରେ ମହମହ ବାସେ

ମାଖେ ଭୂଆଷୁଣି ସାରା ଶରୀର । ୪ ।

ଋତୁ ବଦଳିଲେ ତା ରୂପ ବଦଳେ

କେବେ ସେ ଗୋଳିଆ କେବେ ନିର୍ମଳ

ଡହଡହ ତାତି କେବେ ତା ଶରୀର

କେବେ ସେ ହେମାଳ କେବେ ଶୀତଳ । ୫ ।

ମୋ ଗାଁ ପୋଖରୀ କହି ଦେଉଅଛି

ହିଡ଼କୁ ମୋହର କରିଲେ ମଳ

ମୋ କଥା ନମାନି ଯଦି ତୁ କରିବୁ

ରୋଗ ବଇରାଗ ହେବ ପ୍ରବଳ ।୬।