ମେଘ ବରଷିଲା
ମେଘ ବରଷିଲା
ମେଘ ବରଷିଲା ଟୁପୁରୁ ଟାପର
ବଢ଼ିଲା ଧରଣୀ ଶୋଭା
ଯୁଆଡେ ଚାହିଁଲେ ସବୁଜ ସୁଷମା
ଦିଶିଗଲା ମନଲୋଭା ।।
ଗାଆଁର ଦାଣ୍ଡରେ ଆନନ୍ଦେ ଛୁଟିଲା
ବରଷା ପାଣିର ସୁଅ
ଭରିଗଲା ନଦୀ ଗଡ଼ିଆ ପୋଖରୀ
ପୂରିଲା ଦିଶିଲା କୂଅ ।।
ଗୋଟି ଗୋଟି କେତେ ପାଣିର ଫୋଟକା
ସୁଅରେ ଚାଲିଲେ ଭାସି
ଧରିବାକୁ ତାଙ୍କୁ କୁନିପିଲା ଯେତେ
ମେଘରେ ଭିଜିଲେ ଆସି ।।
ତିଆରି ଚାଲିଲା କାଗଜର ଡଙ୍ଗା
ପିଲେ ତିଆରିଲେ ବସି
ପାଣିର ସୁଅରେ ଭସାଇଲେ ଆଣି
ମୁରୁକି ମୁରୁକି ହସି ।।
ଆସର ଜମିଲା ସାଧବବୋହୂଙ୍କ
ଘାସର ଗାଲିଚାପରେ
ହେଲା ଚାଷକାମ ଖେଳିଲା ଆନନ୍ଦ
ଚଷାପୁଅଟିର ଘରେ ।।
କଳାମେଘ ଦେଖି ନାଚିଲା ମୟୂର
ସୁନ୍ଦର ଦିଶିଲା ବନ
ଫୁଟିଲା କଦମ୍ବ ମେଘରେ ବିଜୁଳି
ଚମକିଲା ଘନଘନ ।।
ଗଛରେ ଲତାରେ ବସିଗଲା ନୂଆ
ଫୁଲଫଳଙ୍କର ମେଳା
ଗୀରିଷମ ପରେ ଆସିଲା ଧରାକୁ
ଶୀତଳ ମଧୁର ବେଳା ।।
ମେଘ ବରଷିଲା ଟୁପୁରୁ ଟାପର
ଚାରିଆଡ଼େ ହେଲା ପାଣି
ବେଙ୍ଗ ହେଲା ରାଜା ବେଙ୍ଗୁଲୀନାନୀଟା
କହିଲା ମୁଁ ହେଲି ରାଣୀ ।।