ମଦନ ମୋହନ

ନୂଆ ନଟବର ରସିକ ନାଗର

ଚନ୍ଦନ ବେଶ ମଦନ ମୋହନ

କୋଟିଏ କନ୍ଦର୍ପ କାନ୍ତି ଅପରୂପ

ବୋଳା ଅଙ୍ଗେ ଗୋଳା ଚୁଆଚନ୍ଦନ l

ବେଦପତି ଦେଲେ ଅପୂର୍ଵ ମୁରଲୀ

କହ୍ନାଇ ହସ୍ତରେ କି ଶୋଭାବନ

ପଞ୍ଚମେ ଡାକଇ ରାଧିକା,ଗୋପିକା,

ଚନ୍ଦ୍ରାବଳି ତୋଳି ଅମୃତ ସ୍ଵନ l

ବଙ୍କିମ ଅଧର ବାଙ୍କ ଚାହାଣି ତା

ବାଙ୍କ ଶିରେ ବଙ୍କା ମୟୁର ଚୂଳ

ଶିରେ ଠିଆ ଚିତା ସୁବର୍ଣ୍ଣ ପଇତା

କଣ୍ଠେ ବନମାଳ ଗୋପ ଗୋପାଳ l

ପୀତାମ୍ବରୀ ପାଟ କଦମ୍ବ ମୁକୁଟ

ପାକଲା ଗାମୁଛା ତ୍ରିକଛ କଛା

ମାଆ ଯଶୋମତି ବେଶ କରିଛନ୍ତି

କୃଷ୍ଣ ବୃନ୍ଦାବନେ ଚରାନ୍ତି ବତ୍ସା l

ଜୟ ବନମାଳୀ ଗୋପର ଗୁଆଳି

ଜୟ କଳା କାହ୍ନୁ ବଂଶୀ ବଦନ

ଯଶୋଦା ଦୁଲାଳ ଜୟ ନନ୍ଦବାଳ

ଶରଣ ପଶିଲି ଛନ୍ଦା ଚରଣ l