🍁🍁ମାଟି🍁🍁

   

ଅଖିଳ ବ୍ରହ୍ମାଣ୍ଡ ଚରାଚର ବିଶ୍ୱ

ସର୍ଵ ମୂଳାଧାର ମାଟି

ମାଟିରେ ଜନମ ମାଟିରେ କରମ

ଶେଷ ଶଯ୍ୟା ତୋର ମାଟି ।1

ଜଳସ୍ଥଳ ନଭ ପାହାଡ଼ କାନ୍ତାର

ଜୀଵଚକ୍ର ଘଟ ମାଟି

ମାଟିରୁ ଆରମ୍ଭ ମାଟିରେ ବିଲୟ

ମାଟି ତୋର ଚଉକାଠି ।2।

ମାଟି ତୋର ମାଆ ଜନ୍ମଦାତ୍ରୀ ଯାହା

ଦିହେଁ ସ୍ୱର୍ଗ ଠାରୁ ବଡ଼

ମାଆ ମାଟିକୁ ଯେ ହେୟ ଜ୍ଞାନ କରେ

ସଂସାରରେ ସିଏ ମୂଢ଼ ।3।

ମାଟିରୁ ଝରୁଛି ଜୀବନର ଝର

ମାଟିରେ ପ୍ରାଣ ସ୍ପନ୍ଦନ

ଏନ୍ତୁଡ଼ି ଶାଳରୁ ମଶାଣି ପର୍ଯ୍ୟନ୍ତ

ସବୁମାଟି ଅବଦାନ ।4।

ମାଟିର ମଣିଷ ଉଭା ତୁ ମାଟିରେ

ପାଦ ଧରିଛି ତୋମାଟି

ପେଟେଇ ଆଣ୍ଠେଇ ଚାଲୁଛି ମାଟିରେ

ପ୍ରଣାନ୍ତେ ହୋଇବୁ ମାଟି ।5।

ମାଆର ପଣତ ଭୁବନ ଢାଙ୍କିଛି

ମାଟି ଧରିଛି ମହୀକୁ

ସନ୍ତାନ ବତ୍ସଳା ଦୟା କ୍ଷମାଶୀଳା

ପାଳୁଛୁ ଜଗତ ଟାକୁ ।6।

ମାଆ ଛାତି ତଳେ ସ୍ନେହ ପ୍ରେମଝର

ସନ୍ତାନ ମଙ୍ଗଳ ପାଇଁ

ମାଟି ଗରଭରେ ଅମୂଲ୍ୟ ସମ୍ପଦ

ଜଗତ ଜୀଵନ ପାଇଁ ।7।

ମାଆଟି ଆମର ମମତା ମନ୍ଦିର

ଦୟା କ୍ଷମାର ସାଗର

ମାଟିର ସ୍ୱରୂପ ଗଭୀର ଉଦାର

ସର୍ଵସଂହା ସୃଷ୍ଟି ସ୍ୱର ।8।

ମାଟି ମଥାନରେ ବହଳ ନୀଳିମା

କୋଳେ ସବୁଜ ବନାନୀ

ମାଟି ଧମନୀରେ ଅମୃତ ନିର୍ଝର

ଜୀବ ପ୍ରାଣ ସଂଜୀବନୀ ।9।

ଚିନ୍ତାତୀତ ମାଆ ମାଟିର କଳ୍ପନା

ପଞ୍ଚଭୂତେ ମହାଶକ୍ତି

ମାଟି ପାଇଁ ଯାହା ବ୍ରହ୍ମାଣ୍ଡସମ୍ଭବ

ଅପୂର୍ବ ବିଭୁଙ୍କ କୃତି ।10।

ମାଟିରେ ଫଳୁଛି ସୁନାର ଫସଲ

ବନସ୍ପତି ବନୌଷଧି

ନଦ ନଦୀ ହ୍ରଦ ସାଗର ବିଭବ

ଜନ ଜୀବନ ସମୃଦ୍ଧି ।11।

ଆର୍ଯ୍ୟବର୍ତ୍ତ ମାଟି ପବିତ୍ରା ପ୍ରସିଦ୍ଧି

ଓଁ କାର ଶବ୍ଦନିନାଦ

ସାଧୁସନ୍ଥ ଶାସ୍ତ୍ର ପୂର୍ଣ୍ଣ ଏ ଭାରତ

ବିଶ୍ୱ ବିସ୍ମିତ ନିସ୍ତବ୍ଧ ।12।

ସତ୍ୟଯୁଗେ ମାଟି ସ୍ଵର୍ଣ୍ଣ କମଳିନୀ

ତ୍ରେତାରେ କାନ୍ତ କଲ୍ଲୋଳା

ଦ୍ୱାପରେ ଦାନବ ଦାଉରେ ମଳିନ

କଳିରେ ସର୍ବାଙ୍ଗ କଳା ।13।

ବନ୍ଦର କଉଡ଼ି ପନ୍ଦର ଦିନକୁ

ପରବାସୀ ଧନ ମାସେ

ହିଡ ମାଟି ହିଡ ଉପରେ ଲଦିଲେ

ବଂଚିବୁ ତୁହି ହରଷେ ।14।

ଛାଟି ପିଟି ହୋଇ ଆଗକୁ ଧାଇଁଛୁ

ଗୋଡ଼ତଳେ ନାହିଁ ମାଟି

ମୂଳ ଛାଡି ଆଣ୍ଟେ ଡାଳକୁ ଧରିଛୁ

ପଡ଼ିବୁ ତଳେ ଲେଉଟି ।15।

ମାଟି ପିଠି କାନ୍ଧ ଏବେ ରକ୍ତସ୍ନାନ

ଯେତେତୁ ଲଦୁଛୁ ବୋଝ

ଶାଗୁଣା ପରି ତୁ ଅନ୍ତ ତାଡି ଖାଉ

ପାରି ତୁ ସଭ୍ୟତା ଶେଯ ।16।

ମାଆକୁ ପୂଜିବୁ ମାଟିକୁ ମାଜିବୁ

ଭାଗ୍ୟକର୍ମ ଅନ୍ନଦାତା

ମାଆ ମାଟି ଝୁଣ୍ଟି ଯୁଆଡେ ତୁ ଯିବୁ

ନିଶ୍ଚେ ହଜିବ ତୋ ସତ୍ତା ।17।

ଆଉ କେବେ ତୋର ସଦ୍ ଜ୍ଞାନ ଉଇଁବ

ବୁଝିବୁ ମାଟି ବେଦନା

ମାଆ ମାଟି ଋଣ କେହି ଶୁଝି ନାହିଁ

ତୁଚ୍ଛା କୁମ୍ଭୀର କାନ୍ଦଣା । 18।

ଧନ ମାନ ଜ୍ଞାନ ପ୍ରତିଷ୍ଠା ସମ୍ମାନ

ସବୁମୂଳେ ଅଛି ମାଟି

ମଥା ପାତି ତୁହି ମାଟି ସେବାକର

ହସି ଉଠିବ ତୋ ସୃଷ୍ଟି ।19।