Library
ମାଲ୍ୟାଣୀଲୋ ଭଲ କଲୁ
ମାଲ୍ୟାଣୀଲୋ ଭଲ କଲୁ
ମାଲ୍ୟାଣି ଲୋ, ଭଲ କଲୁ,
ଦିନ ଆଲୁଅରେ ମୋତେ
ତୋର ମେଣ୍ଢା କରି ଦେଲୁ ।
ଗହନ ରାତିରେ କିଛି କ୍ଷଣ
ମୋର ପରିଚୟ, ମୋର ଅସ୍ମିତା
ମୋ ପାଖେ ଛାଡି ଦେଲୁ,
କିଛି ଘଡି ତ ମୋତେ ନିର୍ଦ୍ୱନ୍ଦରେ,
ମୋ ପରି ଜିଇଁବାକୁ ଦେଲୁ !
ଏଇ ସହରର ପ୍ରତିଟି ଗଳିରେ
ପ୍ରତି ଚଉଛକି ପାଶେ,
କେତେ ଯେ ବୁଲୁ ଛନ୍ତି
ମାଲ୍ୟାଣୀ ଲୋ,
ତୋରି ଛଦ୍ମବେଶ ନେଇ ।
ମିଠା ମିଠା କଥା କହି,
କେବେ ନାଲି ଟହ ଟହ
ଗୋଲାପ ଦେଖାଇ,
ମୋହି ନେଇ ଯାଆନ୍ତି ଲୋ
ସରଳିଆ ଗାଈଆଳ ମନ ।
ବିଚରା କିି ଜାଣେ
ଦୁନିଆର ଛନ୍ଦ କପଟ ଯେତେ,
କେବେ ଗୋଲାପ ଦେଖି ଖୁସି ହୋଇ ଯାଏ,
କେବେ ଚକ୍ ମକ୍ ରୂପର ମୋହରେ
ଅନାୟାସେ ବନ୍ଦି ହୋଇ ଯାଏ ।
ମାଲ୍ୟାଣୀ ଲୋ,
ଏଠି ତ ଭଳିକି ଭଳି ଆସନ୍ତି,
ରୂପ ବଦଳେଇ ବଦଳେଇ,
କେତେ ଧୋବ ଧାବଳିଆ ହୋଇ ।
କେବେ ମିଛ ଲୁହରେ ଭିଜେଇ ଦିଅନ୍ତି,
କେବେ ସୁନାର ସପନ ଦେଖାନ୍ତି,
ଆଉ ଦେଖୁ ଦେଖୁ ଆଖି ପଲକରେ
ମେଣ୍ଢା କରି ଦିଅନ୍ତି ସବୁଦିନ ପାଇଁ,
ଶେଷେ ଛାଡି ଦେଇ ଯାଆନ୍ତି
ଅଗନା ଅଗନି
ଗହନ ବନସ୍ତରେ ନେଇ ।
ମାଲ୍ୟାଣୀ ଲୋ, ଡର ଲାଗେ ଆଜି,
ଦୁନିଆର ରଙ୍ଗ ଢଙ୍ଗ ଦେଖି,
ସରଳତା ଗୁଣ ନୁହେଁ ଏଠି,
ସରଳତା ସହଜରେ
ସମ୍ମୋହିତ ହୋଇ ଯାଏ ବୋଲି ।
ଧୂର୍ତ୍ତ ବ୍ୟାଧ ଘୁମନ୍ତି ଚଉଦିଗେ,
ମେଣ୍ଡା ତ କରି ଦେବେ ଘଡିକରେ,
ଆଉ, ଦିନ ସରିବା ଆଗରୁ
କାଟିକୁଟି ଖାଇ ଯିବେ,
ପୁଳା ପୁଳା କଞ୍ଚା ମାଂସ,
ଭୋକିଲା ଶାର୍ଗୁଣାର ଦଳ
ଉଡୁଛନ୍ତି ଡେଣା ତାଙ୍କ ମେଲି ।
***0***
