ମାଗୁଛି କରୁଣା ଟିକେ
ମାଗୁଛି କରୁଣା ଟିକେ
ମାଗୁନାହିଁ ଧନ ଜନ ଗୋପ ଲକ୍ଷ୍ମୀ
ମାଗୁଛି କରୁଣା ଟିକେ
ଦୟାକର ବାରେ ଜଗତର ନାଥ
ସ୍ପର୍ଶ କର ମାତା ବୁକେ।
ଯନ୍ତ୍ରଣା ସିକ୍ତ ମୋ ମାତା ରାଣୀ ଦେଖ
ସହି ପାରୁନାହିଁ ନେତ୍ର
ସଂସାର ମୋହରେ ପଡ଼ି ଦିନ ଗଲା
ପଢ଼ି ନାହିଁ ଦିନେ ସ୍ତୋତ୍ର।
ସନ୍ତାନ ବତ୍ସଳା ଲୋଭ ବସେ ପଡ଼ି
ହେଉଅଛି ଛଟପଟ
ଦୟା କର ବାରେ ଆହେ ହୃଷୀକେଶ
ନକରି ତୁମେ କପଟ ।
ସବୁ ଦୋଷାଦୋଷ କ୍ଷମା କରିଦେଇ
ଯନ୍ତ୍ରଣାରୁ କର ମୁକ୍ତ
ମନରୁ ତାଙ୍କର ମାୟାର ପଟଳ
ଦୂରେଇ ସଜାନ୍ତୁ ଭକ୍ତ।
ଦିଅ ସଦଗତି ଆହେ ଲକ୍ଷ୍ମୀ ପତି
ତୁଣ୍ଡେ ଥାଉ ତୁମ ନାମ
ଶେଷ ସମୟରେ କୃଷ୍ଣ ନାମ ଜପି
ଯାଆନ୍ତୁ ବୈକୁଣ୍ଠ ଧାମ।
ଏହି ଅଳି ମୋର ପୂରଣ କର ହେ
ବଂଶିଧାରୀ ନନ୍ଦସୂତ
ଶରଣ ଦିଅ ହେ ଶ୍ରୀପଦେ ତୁମର
କୃତ କର୍ମ କରି ଧୌତ।