ମାଆ
ମାଆ
ମାଆ ତୋ ମମତା ସାଗର ଠୁ ବଡ
ଅଟଇ ଅମୂଲ୍ୟ ମୋତି
ଯିଏ ମୋ ଜୀବନେ ଢାଳି ଦେଇଅଛି
ଅଲିଭା ସୁନ୍ଦର ଜ୍ୟୋତି ।
ସବୁ ସଂପର୍କର ସୀମା ସରହଦେ
ସଂପର୍କ ଆକାଶ ଛୁଆଁ
ସବୁ ସଂପର୍କ ଠୁ ତୁ ବି ଗଣତିରେ
ନ' ମାସ ଯେ ଆଗୁଆ ।
ମାଆ ତୋର ମନ ଆକାଶୁ ମହାନ
ପୃଥିବୀ ଠୁ ବେଶୀ ସହେ
ମାଆ ତୋର ମନ ସବୁବେଳେ ଖାଲି
ମୋ ସୁଖ ମନାସୁ ଥାଏ ।
ମାଆ ତୋର ଚିନ୍ତା ଚେତନା ସବୁ ଯେ
ମୋ ପାଇଁ ଯେ ସମର୍ପିତ
ମୋ ଚଲା ପଥକୁ ସୁଗମ କରିବା
ତୋର ଚିରନ୍ତନ ବ୍ରତ ।
ତୋ ପଣତ କାନି ମୋ ପାଇଁ ମାଆ ଲୋ
ପତିତପାବନ ନେତ
ତୋ କୋଳ ମୋ ପାଇଁ ତୁଳି ତଳ୍ପ ଠାରୁ
ଅଟେ ବେଶି ଆକର୍ଷିତ ।
ତୋ କୋଳରେ ମୁଣ୍ଡ ରଖି ଶୋଇଗଲେ
ବ୍ୟଥା ବେଦନା ମୋ ଲିଭେ
ତୋର ଆଶୀର୍ବାଦେ ଜୀବନ ଯାତ୍ରା ମୋ
ସଫଳ ଯେ ହେଉଥାଏ ।
ମାଆ ତୋର କୋଳ ନିର୍ଭୟ ମନ୍ଦିର
ବିପଦେ ସାହସ ଦିଏ
ତୋ ନିଃସ୍ଵାର୍ଥ ସେବା ପ୍ରତିଟି ସନ୍ତାନେ
ଆନନ୍ଦ ପ୍ରଦାନ କରେ ।
ମୋ ମୁହଁକୁ ଚାହିଁ ବୁଝି ନେଉ ତୁହି
ମୋ ମନ ତଳର କଥା
ନିଜ ଜୀବନକୁ ବିପନ୍ନ କରି ତୁ
ସନ୍ତାନେ ଦେଉ ଭରସା ।
ମନେ ପଡେ ମାଆ ପିଲାବେଳ କଥା
କେତେ ମିଛ ତୁ କହିଛୁ
କିଛି ନ ଖାଇ ବି ମୋହ ପାଇଁ ତୁହି
ଖାଇବା ଆଣି ଦେଇଛୁ ।
ମହାର୍ଘ ମିଛ ତୋ ମୋ ପାଇଁ ଲୋ ମାଆ
ସତ୍ୟ ଠୁ ଅଟେ ପବିତ୍ର
ଯେଉଁ ମିଛ ତାର ସ୍ଵତନ୍ତ୍ରତା କଥା
କରାଇ ଥାଏ ଚିତ୍ରିତ ।
ମୋ ପାଇଁ ମାଆ ଲୋ କେତେ ଉପବାସ
କେତେ ଦେବ ଦେବୀ ପୂଜା
ସବୁ ତୁ କରିଛୁ ଜୀବନ ଜଞ୍ଜାଳେ
ସହିଛୁ ଅନେକ ବ୍ୟଥା ।
ମୋର ବେଦନାକୁ ଭୁଲାଇବା ପାଇଁ
କେତେ ବେଦନା ସହିଛୁ
କେବେ କହି ନାହୁଁ ମନ ଖୋଲି ମାଆ
ମୋ ସୁଖେ ସୁଖି ହୋଇଛୁ ।
ଆଜି---
ସଫେଦ୍ ହୋଇଛି ବୟସ ତୋହର
ଚାହିଁଲେ ପାରୁନୁ କହି
ହେଲେ ମନେପଡେ ତୋ ହାତ ପରଶା
ପାରୁନି ତ କେବେ ଭୁଲି ।
ତୋ ସ୍ନେହ ଝରଣା ଅନ୍ତଃ-ସଲିଳା
ଆଜି ହୋଇ ବହୁଅଛି
ମୁଁ ଜାଣିଛି ମାଆ ତୋ ଅକୁହା କଥା
କେତେ କଥା କହୁଅଛି ।
ତୋ ଆଶୀର୍ବାଦରେ ବଡ଼ ମୁଁ ହୋଇଛି
ମୋ ପାଇଁ ତୁ ଯେ ମହାନ
ତୋର ହାତ ସଦା ମୋ ମୁଣ୍ଡରେ ଥାଉ
କରୁ ଥା ମୋତେ କଲ୍ୟାଣ ।
ତୋ ପାଇଁ ମାଆ ଲୋ ମୋ ପାଖେ କେବେ ବି
ସମୟା ଭାବ ନ ହେଉ
ତୋ ସୁଖ-ଦୁଃଖରେ ଏଇ ତୋ ସନ୍ତାନ
ସଦା ତୋ ସାଥିରେ ଥାଉ ।
ମଣିଷ ଜନମ ଦେଇ ତୁ ମାଆ ଲୋ
କରି ଦେଲୁ ମୋତେ ଧନ୍ୟ
ତୁ ପରା ମୋ ପାଇଁ ଚଳନ୍ତି ଠାକୁର
କରୁଛି ତୋତେ ନମନ ।