ଲାବଣ୍ୟମୟୀ ମୌସୁମୀ

ସୁନ୍ଦର ଲାବଣ୍ୟ ତନୁ ଧରି କରି

   ଆସିଛି ଲାବଣ୍ୟମୟୀ

ବର୍ଷା ରାଣୀ କାନି ପଣତରେ ଦେବ

  ଧରଣୀକୁ ସେ ଭିଜାଇ 

ଫୁଲେଇ ମୌସୁମୀ ଝିପି ଝିପି ବର୍ଷା

   ରେ ଆସଇ ଝୁମି ଝୁମି

ଉତ୍ତପ୍ତ ଧରାକୁ ଶୀତଳ ସ୍ପର୍ଶର

   ପରଷରେ ଦେବ ଚୁମି 

ମୌସୁମୀ ପରଶେ ହସିବ ଧରଣୀ

  ସବୁଜେ ହେବ ଶୋଭିତ

ନିରସ ତରୁରେ ପ୍ରାଣ ସଞ୍ଚରିବ

  ଚାତକ ଯେ ଆନନ୍ଦିତ 

କୁସୁମ ସମ୍ଭାରେ କାନନ ଶୋଭିତ

  ନୃତ୍ୟ କରିବ ମୟୂରୀ

ସାରୁ ବୁଦା ମୂଳେ ବେଙ୍ଗୁଲି ରାଣୀର

  ଶୁଭିବ ଗୀତ ଲହରୀ 

ନାଲି ଗୁଲୁ ଗୁଲୁ ସାଧବ ବୋହୂଟି

  ମୌସୁମୀ ପରଶ ପାଇ

ନୀଳ ଗାଲିଚାରେ ପୃଥିବୀ ବକ୍ଷରେ

  ଆସନ ଦେବ ମେଲାଇ 

ରଜପର୍ବ ପରେ ଶ୍ରୀ ଗୁଣ୍ଡିଚା ଯାତ୍ରା

  ହେବ ମହାପ୍ରଭୁଙ୍କର

ମୌସୁମୀ ରେ ହଜି ବରଷାରେ ଭିଜି

  ରଥ ଉପରେ ଠାକୁର 

ଭକ୍ତ ମାନେ କରୁଥିବେ ଦରଶନ

  ଭକ୍ତିରେ ନିମଜ୍ଜି ଯିବେ

ଲାବଣ୍ୟମୟୀ ସେ ମୋସୁମୀ ଛୁଆଁରେ

  ଖରାକୁ ଯେ ଭୁଲିଯିବେ 

ଲାବଣ୍ୟମୟୀର ପରଶେ ସମସ୍ତେ

  ଆନନ୍ଦେ ହେବେ ବିଭୋର

ପୃଥିବୀ ହସିଲେ ଲୋକଙ୍କର ଦୁଃଖ

  କଷ୍ଟ ହୋଇଯିବ ଦୂର