କଟକ ଦଶହରା
କଟକ ଦଶହରା
ତାରକସି ଗହଣା କୁ ସୁନା ମୁକୁଟ
ସୁନା ଚାନ୍ଦି ମେଢ଼ ରେ ଲୋ ହସେ କଟକ
ବାଉନ ବଜାର ଆଉ ତେପନ ଗଳି
ସାହି ବସ୍ତି ସବୁଆଡେ ଭାରି ଗହଳି
ଶାରଦୀୟ ଦଶହରା
କଟକ ପୂଜା ନିଆରା
ସ୍ନେହ ଶ୍ରଦ୍ଧା ଭାଇଚାରା ଭରେ ପୁଲକ
ସୁନା ଚାନ୍ଦି ମେଢ଼ ରେ ଲୋ ହସେ କଟକ ....
ଯାଗଯଜ୍ଞେ ଉଛୁଳଇ ପୂଜା ମଣ୍ଡପ
ମହକଇ ଧୂପ ଧୂଆଁ ଆଳତି ଦୀପ
ଉପଚାର ଉପାସନା ଉପାସ ବ୍ରତ
କଣାଏ କରୁଣା ପାଇଁ ଆକୁଳ ଭକ୍ତ
ନବପତ୍ର ନବଦୁର୍ଗା
ଚଣ୍ଡୀ ପାଠ ସନ୍ଧିପୂଜା
ସବୁରି କଣ୍ଠେ ମାଆଙ୍କ ମହିମା ଗୀତ
ତାରକସି ଗହଣା କୁ ସୁନା ମୁକୁଟ .….
ବାଟ ଘାଟ ନଈ ତୁଠ ବାଲି ପଠାରେ
ମାଆଙ୍କର ଛାଇ ଦିଶେ ମେଘ ମଥାରେ
ମହାନଦୀ କାଠଯୋଡି ପବିତ୍ର ପାଣି
ଭାବ ଭକତି ର ରଙ୍ଗ ଯାଏ ରେ ବୁଣି
ମାଆ ଗୋ ମମତାମୟୀ
ସ୍ନେହମୟୀ ଦୟାମୟୀ
ଦୟା କର ଦୂର ହେଉ ଦୁଃଖ ଦୁରିତ
ତାରକସି ଗହଣା କୁ ସୁନା ମୁକୁଟ .….