କ୍ଷୀରାବ୍ଧି ତନୟା
କ୍ଷୀରାବ୍ଧି ତନୟା
ଜୟ ଜୟ ମହାଲକ୍ଷ୍ମୀ କ୍ଷୀରାବ୍ଧି ତନୟା
ଜଗତକଲ୍ୟାଣୀ ମାତ ତୁହି ମହାମାୟା l
ବନ୍ଦଇ ମା' ମହାଲକ୍ଷ୍ମୀ ସାଗରକନ୍ୟକା
ଚରାଚର ପ୍ରାଣୀଙ୍କର ଆଶ୍ରୟ ତୁ ଏକା l
ବନ୍ଦଇ ମା ମହାଲକ୍ଷ୍ମୀ ମାତା ହରିପ୍ରିୟା
ଜୀବଙ୍କ ଆଶ୍ରୟ ତୋର ପଣତର ଛାୟା l
ଦୟାମୟୀ ଜଗଦ୍ଧାତ୍ରୀ ମାଆ ତୁ ମଙ୍ଗଳା
ତୋର କୃପାବିନେ ମାତ ସରବେ ଲଙ୍ଗଳା l
ବନ୍ଦଇ ମା ମହାଲକ୍ଷ୍ମୀ ଦେବୀ ଶାକାମ୍ବରୀ
ପ୍ରାଣୀଙ୍କୁ ତୁ ପାଳିଥାଉ ତୋ ସନ୍ତାନ ପରି l
ଛପନ କୋଟି ଜୀବଙ୍କୁ ଭଣ୍ଡାର ତୁ ଖଞ୍ଜି
ଛପନ ଭୋଗେ ଜଗତ ନାଥ ଚିତ୍ତ ରଞ୍ଜି l
ସଂସାରକୁ ପାଳୁ ମାତେ ଦେଇ ବସ୍ତ୍ର ଅନ୍ନ
ତୋ' କୃପା ବିହୁନେ ମାତ ଜଗତ ଉଛନ୍ନ l
ତୋର କୋପୁ ମାତ ଦିନେ ଜଗତଠାକୁର
ବୁଲି ଥିଲେ ଶୁଣ୍ଢୀ ପିଣ୍ଡା ଭିକ୍ଷୁ ବାର ଦ୍ୱାର l
ତୋ ମହିମା ମହାଦେବୀ କେ ପାରିବ ବର୍ଣ୍ଣି
ତୋ କରୁଣାବଳେ ତାହା କିଞ୍ଚିତ ବଖାଣି l
ଦୟିନୀ କରୁଛି ମାଆ ଅଜ୍ଞାନ ପାମର
ତୋ ପାଦ ପଙ୍କଜ ମାତ ଆଶ୍ରୟ ମୋହର l