କୃଷ୍ଣଚୂଡ଼ା

କୃଷ୍ଣଚୂଡ଼ା ତୁମେ ଦିଶ କି ସୁନ୍ଦର

ନାଲି ହଳଦିଆ ରଙ୍ଗେ,

ତୁମ ରୂପକାନ୍ତି ମନେ ଭରେ ଶାନ୍ତି

ମାଦକତା ଭରେ ଅଙ୍ଗେ |

ବୈଶାଖ ପ୍ରଖର ରୌଦ୍ର ତାପରେବି

ଫିକା ପଡ଼େନାହିଁ ରଙ୍ଗ,

ମୃଦୁ ମଳୟରେ ଲହରଉ ଥାଅ

ଯେସନେ ଜଳ ତରଙ୍ଗ |

ତୁମକୁ ଦେଖିଲେ ନଜର ଫେରେନା

ପଲକ ପଡ଼େନା ଆଖି,

ନିଦାଘ ଦୁଃଖରେ ଯନ୍ତ୍ରଣା ଦୁରାଅ

ସୌନ୍ଦର୍ଯ୍ୟତା ତାର ସାକ୍ଷୀ |

ଚତୁର୍ଦିଗେ ତୁମ ବିଛୁରିତ ଆଭା

ଦିଶେ କେଡ଼େ ମନଲୋଭା,

ମାଟିର ଉପରେ ଫୁଲର ପାଖୁଡ଼ା

ଅତୁଳନୀୟ ସେ ଶୋଭା |