କୋପ କର ଦେବୀ ଶେଷ
କୋପ କର ଦେବୀ ଶେଷ
ତୁମ ପଦ ଧରି ରାଧିକେ ଗୋ ଏବେ
ହେଉଛି ମୁଁ ନିଉଛାଳି,
ମୋ ଉପରେ ଥିବା ରୋଷ ପରିହର
ଦେଲେ ଦିଅ ଯେତେ ଗାଳି ।
ଚନ୍ଦ୍ରାବଳୀ କୁଞ୍ଜେ ବିଜେ କଲି ବୋଲି
ଅଭିମାନ ଅଛ କରି,
ଚାହିଁଦେଖ ତୁମ ଅଙ୍ଗ ସଙ୍ଗ ବିନା
ହୋଇଲିଣି କେତେ ସରି ।
ତୁମରି ହୋଇ ତ ଅଛି ସବୁଦିନ
ରହିଛି ମୁଁ ରହିଥିବି,
ଶ୍ରଦ୍ଧା ବହି କିଏ ମୋ ପଦ ପୂଜିଲେ
କାହିଁକି ଗୋ ଦୋଷୀ ହେବି ।
ତୁମ ମାନ ସଖି ଭାଙ୍ଗିବା ସକାଶେ
ଧରିଲିଣି କେତେ ବେଶ,
ଧୈର୍ଯ୍ୟଚ୍ୟୁତି ଏବେ ଘଟିଲାଣି ମୋର
କୋପ କର 'ଦେବୀ' ଶେଷ ।
ଶ୍ରୀମତୀ ଗୋ ମୋତେ ଆପଣାଇ ନିଅ
ଦୋଷାଦୋଷ କର କ୍ଷମା,
ପ୍ରେମମୟୀ ଆଜି କଥା ଦେଉଛି-ଏ
ଭୁଲ ହେବନାହିଁ ଜମା ।