କଳା କାଞ୍ଚନ
କଳା କାଞ୍ଚନ
କଳା କାଞ୍ଚନ ମୋ କଳା କାଞ୍ଚନ
କରୁଣା ସାଗର କୃପା ନିଦାନ
କରିଥିଲି କାଳେ କି କୃତ୍ୟ ଏକାଳେ
କରିଲି ତୋ କଳାମୁଖ ଦର୍ଶନ।।
କଞ୍ଜ କଳା ବୋଳା ମୁଖ ଶିରୀ କି
କେତେ ରଙ୍ଗେ ରସେ ରଖି ଭରି କି
କାନ୍ତ ଶାନ୍ତ କଳା କମଳ ଆଖି କୁ
କରୁଣା ବାରିଧି କିବା ସମାନ।।
କଞ୍ଜ କମଳ କୋମଳ ନୟନ
କୁଞ୍ଜବିହାରି ଶ୍ରୀରାଧା ମୋହନ
କରି-ଅରି ହାରୀ, ହର ଦୁଃଖ ଭାରି
କରେ କରି କର କରେ ପ୍ରଣାମ।।
କିଙ୍କର ମଣେ ଅକୀଞ୍ଚନ ଜଣେ
କରେ ଗୁହାରି ମୁଁ ଭିକାରୀ ପଣେ
କିପରି କରିବ ପାରି ତୁମେ ଜାଣ
କି କରି କହିବି ଦୀନ ଅଧମ।।
କେଜାଣି କାହିଁକି ମନ କହୁଛି
କେଇ ଦଣ୍ଡ ଆଉ ଜୀବ ରହିଛି
କରୁ କରୁ ତୋର ଶ୍ରୀମୁଖ ଦର୍ଶନ
କାଳେ ଉଡ଼ି ଯା'ନ୍ତା ପିଣ୍ଡୁ ପରାଣ।
କରେ କାରୁଣ୍ୟ କାକୁତି ବାମନ।।