କିଛି ଅକୁହା
କିଛି ଅକୁହା
ଦିନେ ସଂଜ ବେଳେ
ଶୋଇ ତୁମ କୋଳେ
ଦେଖୁ ଥିଲି ତୁମ ମୁହଁ ,
ଓଠରେ ମୋ ଆସି
ପଡ଼ୁ ଥିଲା ଖସି
ମିଠା ମିଠା ତୁମ ଲୁହ ।
ପିୟାସା ମୁଁ ଥିଲି
ପିଇ ଯାଉଥିଲି
ଜଳି ଯାଉଥିଲା ଦେହ ,
ପହିଲି ପ୍ରେମର
ମହୁଲି ନିଶାରେ
ଝୁମୁ ଥିଲି ତୁମ ସହ ।
ତୁମକୁ ପାଇବି
ନିଦ ହଜି ଗଲା
ଆଖିରେ ସ୍ବପ୍ନର ଢେଉ ,
ଆଜି ସେଇ ଦିନ
ଲାଗୁଛି ସପନ
ସପନ ଆସୁନି ଆଉ ।
ଭଲ ପାଇବାଟା
ନିହାତି ସହଜ
ବିବାହ ଆଗରୁ ଜାଣେ,
ବାହା ହେଲା ପରେ
ଆଜି ମୁଁ ବୁଝୁଛି
ଭଲ ପାଇବାର ମାନେ ।
ସେତେ ବେଳେ ବ୍ରହ୍ମା
ବିଗିଡ଼ିଲେ ବେଦ
ଭୁଲ୍ ଥିଲେ ଧର କାନ ,
ଏବେ ଚୋଟ ମାର
କଥାରେ କଥାରେ
ପାନରୁ ଖସିଲେ ଚୂନ ।
ଡାକ୍ତର ବଇଦ
କିଏବା ଦେଖିବ
ଅଜାଗାରେ ହେଲେ ଘା' ,
ନିଜର କାହାଣୀ
ନିଜକୁ ଶୁଣାଏ
ଯେହେତୁ କିଛି ଅକୁହା ।
**~**