ଖୁସିମନସ୍କ

କବିତା - ଖୁସିମନସ୍କ
ରଚନା - ପଞ୍ଚାନନ ଜେନା
 ତାରିଖ -୩୦-୧୦-୨୦୨୫
+++++++++++++++
 ଚାରି ଦିନର ପରା ଆମ ଜୀବନ
 ସବୁ ସମୟରେ ହେବା ଖୁସିମନ
କାମଦାମରେ ବି ଖୁସି
 ଆରାମ ବିଶ୍ରାମରେ ବି ଖୁସି
ଜାଣିଶୁଣି କାହିଁକି ହେବା ଦୁଃଖିଜନ ?

 ଆଜି ମାଛ ମାଉଁସ ନାହିଁ, ଘାଣ୍ଟ ଭଜାରେ ବି ଖୁସି
 ଆଜି ନଅ ତିଅଣ ନାହିଁ ,ଡ଼ାଲିପାଣିରେ ବି ଖୁସି
ଆଜି ଚାଉଳ ନାହିଁ ,ବାସି ପଖାଳରେ ବି ଖୁସି
ଜାଣୁଜାଣୁ କାହିଁକି କରିବା ଗର୍ଜନ ତର୍ଜନ ?

 ଆଜି ସାଙ୍ଗଟେ ରାଗିଛି,ସେହି କଟୁକ୍ତିରେ ବି ଖୁସି
 ଆଜି ଶ୍ରୀମତୀ ଗରଗର ,ସେହି ଆଡ଼ଋଷାରେ ବି ଖୁସି
ଆଜି ବାଇକ୍ ପମ୍ପଚର୍ ହେଲା ,ସେହି ଝାଳନାଳରେ ବି ଖୁସି
 ବୁଝି ହେଉନି କାହିଁକି ଆସୁଛି ଏ ସବୁ ଦୁର୍ଦ୍ଦିନ ?

 ଯାହାର ଦର୍ଶନ ମିଳୁନି , ତା'ର ଭିଡିଓରେ ବି ଖୁସି
 ଯାହାକୁ ପାଇ ହେବନି ,ତା'ର ଭାବନାରେ ବି ଖୁସି
 ଯାହାର ପ୍ରେମ ମିଳୁନି , ତା'ର ଅତୀତମନ୍ଥନରେ ବି ଖୁସି
ସମୟ ବଦଳିପାରେ ହେବାନି କାହିଁକି ଆଶାବାନ ?

 ଯାହାର ଫୋନ ଲାଗୁନି ,ମ୍ୟାସେଜ୍ ଦେବାରେ ବି ଖୁସି
 ବନ୍ଧୁମିଳନକୁ ଯାଇ ହେଲାନି ,ଛୋଟ ଉତ୍ତରରେ ବି ଖୁସି
 ଗ୍ରୁପ୍ ରୁ ଜଣେ ଖସିଗଲା ,ତା'ର ସ୍ୱଇଚ୍ଛା ଭାବରେ ବି ଖୁସି
ସ୍ୱାଧୀନ ଆଚରଣ ବିଚରଣ ହେବ କାହିଁକି ଆଜ୍ଞାଧିନ ?

 ସ୍ଵଳ୍ପ ସୀମିତ ରୋଜଗାର ,ସେହି ଟଙ୍କା ବଳୟରେ ବି ଖୁସି
ଅଧାଗଢ଼ା ଘର ପରିବାର ,ସେହି ଭଙ୍ଗା ଆଳୟରେ ବି ଖୁସି
 ବନ୍ଧୁ ବାନ୍ଧବ ବହୁ ଉପରେ , ସେହି ମଧୁ ମଳୟରେ ବି ଖୁସି
ଅବସ୍ଥାଚକ୍ର ପରା ଘୂର୍ଣ୍ଣିବଳୟ ପରି ସନ୍ଧିହାନ ।

 ଅତୀତ ସରିଛି ମରିଛି ,ତା'ର ମୀଠା ଚୁମ୍ବନରେ ବି ଖୁସି
 ଭବିଷ୍ୟତ ଆଗତ ପ୍ରାୟ ,ତା'ର ସୁନେଲି ଆଲିଙ୍ଗନରେ ବି ଖୁସି
 ଆଗାମୀ କାଲି ଅନିଶ୍ଚିତ , ତା'ର ଖିଆଲି ସସ୍ମୋହନରେ ବି ଖୁସି
 କହୁଛନ୍ତି ସମୟ ପରା କ୍ଷଣ କ୍ଷଣ କେ ଆନ !

 ହସନ୍ତ ସମୟ କ୍ଷଣସ୍ଥାୟୀ , ଘୁମନ୍ତ ଘଣ୍ଟାକଣ୍ଟାରେ ଖୁସି
ତେଲ ଲୁଣର ଜୀବନ , ଜଞ୍ଜାଳ କଟାଳ ରେ ବି ଖୁସି
ଅଭାବ ଅନାଟନର ଜୀବନ , ଦୁଃଖ ଦୈନ୍ୟରେ ବି ଖୁସି
କହି ରଖୁଛି କର୍ମମୟ ଜୀବନ ରଚିପାରେ କିର୍ତ୍ତିମାନ ।