କବି ବନ୍ଦନା

    

ମହାମାୟୀ ସିଦ୍ଧେଶ୍ବରୀ ବାଗ୍ଦେବୀ ଶାରଳା l

ମୂର୍ଖ ସିଦ୍ଧେଶ୍ୱର ହେଲା କବି ଶ୍ରୀ ଶାରଳା ll

ତପସ୍ୱୀ ଉତ୍ତମ ସେ ଭାରତୀ ତୋର ସୁତ l

ସାହିତ୍ୟ ସମ୍ପଦେ ହେଲୁ ଆମ୍ଭେ କୃତକୃତ୍ୟ ll

ଅନ୍ଧାର ଉତ୍କଳେ ପ୍ରକାଶିଲେ ଭାଷା ରବି l

ପଣ୍ଡିତେ ପାଷଣ୍ଡେ ଦେଖାଇଲେ ଭାଷା ଛବି ll

ମହାଭାରତର ଯେତେ ଜଟିଳ ବିଚାର l

ଶିଶୁ କଣ୍ଠ ଗୀତେ କଲ ଅତୀବ ସୁନ୍ଦର ll

ଭାବ,ଭାଷା,ନୀତି, ଛନ୍ଦ ପୂରିତ ପ୍ରବନ୍ଧ l

ଧର୍ମନୀତି, ରାଜନୀତି କଲ ଛନ୍ଦୋବଦ୍ଧ ll

ସର୍ବେ ହୋଇ ଏକଠୁଳ ଛନ୍ଦୋବଦ୍ଧ ଗୀତ l

ଗାଆନ୍ତି ଶୁଣନ୍ତି ଶାରଳା ମହା ଭାରତ ll

ତୁମ୍ଭେ ଅଟ ମହାକବି ଉତ୍କଳର ବ୍ୟାସ l

ନମସ୍ତୁତେ ମହାକବି ଶ୍ରୀଶାରଳା ଦାସ ll