କାନ୍ଦେନି ବୋଉ

 କାନ୍ଦେନି ବୋଉ ଭାଙ୍ଗିଯିବ କାଳେ     

ବାପାଙ୍କର ଏବେ ନିଦ

ଶୋଇପଡିଛନ୍ତି ନିଘୋଡ ନିଦରେ

ଅରୀ ସାଥେ କରି ଯୁଦ୍ଧ ।

ତାଙ୍କ ଦେଶପ୍ରେମ ତାଙ୍କ ବୀରଗାଥା

ସବୁରି ଓଠରେ ଆଜି

ଦେଶର ସୀମାକୁ ଜଗିଥିଲେ ବାପା

ଜୀବନ ଲଗାଇ ବାଜି ।

ଛୁଟିରେ ଯେବେଲତ ଆସୁଥିଲେ ସିଏ

ହସୁଥିଲା ଆମ ଘର

ଫେରିଗଲା ବେଳେ ସବୁରି ଆଖିରୁ

ଝରୁଥିଲା ଲୁହଧାର ।

ଏଥର ମୋ ବାପା ଆସିଛନ୍ତି ଆଉ

ସୀମାକୁ ଯିବେନି ଫେରି

ଫେରିବେନିବୋଲି ଆମ ଗାଆଁ ସାରା

ସଭିଏ ହୁଅନ୍ତି ଝୁରି ।

ତ୍ରିରଙ୍ଗା ପତାକା ଘୋଡାହୋଇଅଛି

ଆଜି ତ ତାଙ୍କରି ଦେହେ

ବିଗୁଲ ସ୍ୱରରେ ବନ୍ଦୁକର ମୁନ

ତାଙ୍କ ଆଗେ ନଇଁଯାଏ ।

ବୀର ବୋଲି ତାଙ୍କୁ ଶେଷ ସନମାନ

ଦେଉଅଛି ଆଜି ଦେଶ

ତାଙ୍କ ଯଶ ଗୀତି ଗାଉଥିବ ସଦା

ଆମ ଗାଆଁ ଇତିହାସ ।

ବାପା ଚାଲିଗଲେ ଅଫେରା ରାଇଜେ

ଚିତା ଜଳେ ଦାଉଦାଉ

କାନ୍ଦେଲୋ ବୋଉ କାନ୍ଦେ ତୁ ଯେତେ

ଉଠିବେନି ବାପା ଆଉ।