କାହିଁକି ହେବି ମୁଁ ଖୁସି ?

ବାରବାର ମୁହିଁ ପଚାରେ ମନକୁ

କହ ମୋତେ ତୁ ଭରସି

ଯାହା ଚାହୁଁଅଛି ତାହା ନ ପାଉଛି

କାହିଁକି ହେବି ମୁଁ ଖୁସି ?

ଉତ୍ତରରେ ମନ ଆଶ୍ବାସୀ କହଇ

ତୋହ ବୁଦ୍ଧିକୁ ପଚାର

ନିଶ୍ଚୟ ତାହାଠୁ ପାଇଯିବୁ ତୁହି

ସବୁ ପ୍ରଶ୍ନର ଉତ୍ତର ।

ବିବେକ ମୁରୁକି ହସିକି କହଇ

ଯାହା ଅର୍ଜୁଛୁ ଭୁଞ୍ଜୁଛୁ

ମନ ଚାହିଁ ଦେଲେ ମିଳିବ କେମିତି

କର୍ତ୍ତବ୍ୟ ଯଦି ଭୁଲୁଛୁ ।

ପ୍ରାରବ୍ଧ, ଏ ଜନ୍ମ କରମର ଫଳ

ଯାଚି ଦିଅନ୍ତି ଈଶ୍ବର

ତାହାରି ଭିତରେ ଖୁସିକୁ ଖୋଜିବା

କରମ ହେଉଛି ତୋର ।

ମୋ ଭାଗ୍ୟ ଖୁସିକୁ ନେଉଛି ଛଡ଼ାଇ

ଦୋଷ ବା ଦେବି କାହାକୁ

ବୃଥା ଅପଳାପ କରି ତୋ ସହିତ

ଚିନ୍ତିବି କେଉଁ ଲାଭକୁ ।

ମୋଠାରୁ ଏକଥା ଶୁଣି ବୁଦ୍ଧି କହେ

ବୃଥା ଭାଗ୍ୟକୁ ତୁ ନିନ୍ଦି

କି ଲାଭ ପାଇବୁ ନିଜକୁ ନଚିହ୍ନି

ହୋଇ ଲୋଭ ମୋହେ ବନ୍ଦୀ ।

ସହଜ ନୁହଁଇ ଈଶ୍ବରେ ପ୍ରାପତ

ନଥିଲେ ମନ ସଂଯମ 

ଚେତନା ଉଦୟ କରିଲେ ହୃଦୟ

ନଥିବ ପ୍ରଶ୍ନର ଭ୍ରମ ।