କାହିଁ ଗଲା ମୋ ପିଲାବେଳ
କାହିଁ ଗଲା ମୋ ପିଲାବେଳ
ମୋ ଠାରୁ ଅନେକ ଦୂରରେ ମୋହର
ଅମାନିଆ ପିଲାବେଳ
ସାତ ସପନ ତ ଲାଗୁଛି ଏଣିକି
ମୋ ବୋଉର ଉଷ୍ମ କୋଳ |
ସାଧୁ ଗଧୁ ଭିମା ସୁନ୍ଦରୀ ସୁଷମା
ଥିଲେ ମୋ ଥିଲେ ମୋ ପ୍ରାଣ ର ମିତ
ସମୟର ତାଳେ ଗଲେ କେଉଁଆଡେ
କା ସାଥେ ହେଉନି ଭେଟ |
ଅଝଟିଆ ପଣ ଛାଡି ମୋ ଗଲାଣି
ବୟସ ହେବାରୁ ବେଶୀ
କାଗଜ ଡ଼ଙ୍ଗା ମୁଁ ହାତରେ ଧରିକି
ଭସାଇ ହେଉନି ଖୁସି |
ଭାଙ୍ଗି ତ ଗଲାଣି ମୋ ମାଟି ସିଲଟ
ଗୁରୁଜୀ ଙ୍କ ନାହିଁ ଛାଟ
ବୋହୁ ବୋହୁ ଖେଳ ଭୁଲି ମୁଁ ଗଲିଣି
ହଜି ଗଲାଣି ମୋ ନାଟ |
କାହିଁ ଗଲା ମୋର ଚକି ଦୋଳି ଖେଳ
ପାଚିଲା ପିଜୁଳି ଚୋରି
ଚୋର ଓ ପୋଲିସ ଖେଳ ଆଉ ନାହିଁ
ବସୁନି ଖୁମାଣି ମାରି |
ଶୁଣିବାକୁ ଆଉ ମନ ମୋ ହେଉନି
ବୁଢ଼ୀ ଅସୁରୁଣୀ ଗପ
କୁଆଁର ପୁନେଇଁ ଗୀତ ବୋଲିବାକୁ
ପକାଇ ବସୁନି ସପ |
କାହିଁ ଗଲା ମୋର ସେହି ପିଲାବେଳ
ଛାଡି ତ ଗଲାଣି ଭୀତି
ମନ ବଳୁନାହିଁ ଧରିବାକୁ ବୁଲି
ରଙ୍ଗୀନ ପରଜାପତି |
କାହିଁ ହଜିଗଲା ଆମ୍ବତୋଟା ବୁଲା
ଗଛ ରୁ ଗଛକୁ ଡିଆଁ
ଗାଁ ଦାଣ୍ଡ ମୁଣ୍ଡେ ବରକୋଳି ଝାଡ଼ି
ଖାଇବାର ମଜା ଆହାଃ |
ବୋଉ ହାତ ଗଢ଼ା ପିଠା ପଣା ଯେତେ
ହଜି ହେଲାଣି ସପନ
ହଜି ତ ଗଲାଣି ବାପାଙ୍କ ଆଦର୍ଶ
ଅଧୁରା ମୋ ପିଲାଦିନ |
ଭାରି ମନେପଡେ ପୁରୁଣା ଦିନ ମୋ
ଜହ୍ନ ଦିଶୁଥିଲା ଚାଳରେ
ଭାଗବତ ପୋଥି ଓଈ ଖାଇଲାଣି
ପଢା ଶୁଭୁନାହିଁ ଟୁଙ୍ଗିରେ |
ମୋ ଭାଇ ଭଉଣୀ ବୁଢ଼ା ବୁଢ଼ୀ ହୋଇ
ପିଲାପିଲି ସହ ସହରେ
ସାଙ୍ଗ ସାଥିମୋର କିଏ ଯେ କେଉଁଠି
ଦେଖାହେଉନି କା'ସାଥିରେ |
ସମୟ ଚୋରାଇ ନେଇଛି ସେ ଦିନ
ଭାବିଲେ ଲାଗୁଛି ବିକଳ
କିଏ ସେ ଫେରାଇ ଦେବ ପିଲାବେଳ
ଝୁରିମରେ ସଞ୍ଜ ସକାଳ ।