ଜୀବନର ନଦୀ ତୀରେ

ଜୀବନର ନଦୀ ତୀରେ

ସକାଳରୁ ସଞ୍ଜ ଯାଏ

କେବେ ନଦୀର କୂଳରେ

ପୁଣି ବାଲି ଗାଲିଚାରେ l

ଚାଲିବାକୁ ହୁଏ

ଜୀବନର ନଦୀ ତୀରେ

କେବେ ଆନନ୍ଦ ମନରେ

ସୁଲୁ ସୁଲୁ ପବନରେ l

କେବେ ଝାଂଜିର ଖରାରେ

ଡହ ଡହ ସେ ବାଲିରେ 

ଚାଲିବାକୁ ହୁଏ

ଜୀବନର ନଦୀ ତୀରେ ।

ବାଲି ମୁଠା ସେତ ବନ୍ଧୁ 

ଝରେ ହାତୁ ପ୍ରତି କ୍ଷଣେ

କହେ ବାଲି ତୁନି କାନେ

ସରେ ଆୟୁ କ୍ଷଣେ କ୍ଷଣେ l

ନାଚିଯା ତୁ ଏବେ ହସି 

ମୋହରି ରେଣୁ ବକ୍ଷରେ

କାଲିକୁ କିଏ ଦେଖିଛି

ଏବେ ନାଚଯା ଝୁମିରେ l

ଦେଖ ଥରେ ମୋତେ ତୁହି

ସ୍ଥିର ତୋହରି ଚିତରେ

କେତେ ଜୀବ ଜନ୍ତୁ ଛନ୍ତି

ପୁଅ ମୋହରି ଗର୍ଭରେ l