ଜୀବନର ଜଳଛବି
ଜୀବନର ଜଳଛବି
ଫୁଲରେ ଫୁଲରେ ଜହ୍ନ ଢାଳୁଛି
ଜ୍ୟୋତ୍ସ୍ନାରେ ଭିଜା ପ୍ରୀତି
ସେପାଇଁ ଲୋ ସଖୀ ହୃଦୟରୁ ମୋର
ହଜିଛି ଅନ୍ଧାର ରାତି I
ମନତଳେ ମୋର ସପନ ସଜାଇ
ଆସୁଛୁ ତୁ ଚାଲି ଚାଲି
ଲୁହରେ କିମ୍ପାଇଁ ଭିଜାଉଛୁ ଆଖି
କହିଦେ' ଥରେ ଖୋଲି I
ତୋ ପ୍ରେମ କେତେ ଲୋ ସରସ ସୁନ୍ଦର
ପବିତ୍ର ମନଟି ତୋର
ସେପାଇଁ ଲୋ ସଖୀ ତୋ' ରଙ୍ଗେ ନିଜକୁ
ରଙ୍ଗାଏ ମୁଁ ବାରମ୍ବାର I
ଜୀବନର ପଥେ ମଧୁଶାଳା ତୁ' ଲୋ
ମୁଁ ଶୋଷେ ଅଧିର ପ୍ରାଣ
ଫୁଲରେ ଫୁଲରେ ସେଥିପାଇଁ ପରା
ଲେଖିଛି ମୁଁ ତୋ'ର ନାମ I
ଝୁମିଯାଏ ଯେବେ ତୋ ପ୍ରେମରେ ମନ
ମୋ ଦୁନିଆ ଯାଏ ଝୁମି
ତୋପାଇଁ ପରା ଲୋ ଦୁନିଆ ଦାଣ୍ଡରେ
ମୁଁ ଏକ ପାଗଳ ପ୍ରେମୀ I
ଆଖି ପାଉନାହିଁ କାହିଁ କେତେଦୂରେ
ଜୀବନର ରୂପକଳ୍ପ
ସଞ୍ଜ ନଇଁଲାଣି ଦିନର ଆଲୁଅ
ଲିଭିଆସେ ଅଳ୍ପ ଅଳ୍ପ I