"ଜୀବନ ଓ ସ୍ୱାଭିମାନ"

ବଞ୍ଚିବାକୁ ହେଲେ ସଞ୍ଚିବାକୁ ହେବ 

ଜୀବନର ସ୍ୱାଭିମାନ 

ନିଜ ସାମର୍ଥ୍ୟରେ ଚାଲିବାକୁ ହେବ 

ନହୋଇ ମର୍ଯ୍ୟାଦାହୀନ ll

ଅଭାବ ସ୍ୱଭାବ ଦୁଇଟି ଜିନିଷ 

ମୁଦ୍ରାର ଦୁଇଟି ପାର୍ଶ୍ୱ 

ସ୍ୱାଭିମାନ ବିନା ଜୀବନ ବାଟରେ 

ସବୁଥାଇ ଲାଗେ ନିଃସ୍ୱ ll

ସ୍ୱଭାବରୁ ଜାତ ଅଭାବ ପ୍ରତୀତ 

ଜୀବନକୁ ଯାଏ ଘେରି 

ପରିସ୍ଥିତି ଆଉ ଅଭାବୀ ସଂସାରେ 

ସ୍ୱାଭିମାନ ଯାଏ ମରି ll

ସ୍ୱାଭିମାନ ଯେବେ ବିକୃତ ହୁଅଇ 

ଅହଂକାର ହୁଏ ଜାତ 

ମାନସିକତାର କଦର୍ଥ ଚିନ୍ତନ 

ଅର୍ଥକୁ କରେ ଅନର୍ଥ ll

ଶାଶ୍ୱତମୟ ଏ ଜୀବନର ଧାରା 

ଅଦ୍ୱିତୀୟ ଅନୁପମ 

ଭବ୍ୟ ତା'ର ସ୍ଥିତି ଭବ୍ୟ ତା'ର ସତ୍ତା

କିଛି ନାହିଁ ତା'ର ସମ ll

ସଂଘର୍ଷମୟ ଏ ଜୀବନ ବିଥିକା 

ଜଞ୍ଜାଳ ଆଶଙ୍କା ଭରା 

ତାହାରି ଭିତରେ ସ୍ୱାଭିମାନୀତାରେ 

ବଞ୍ଚିବାକୁ ହେବ ପରା ll

ଜୀବନ ଜୀବିକା ଗୋଲକ ଧନ୍ଦାରେ 

ଜୀବନଟା ଯାଏ ଫସି 

ସ୍ୱାଭିମାନ ଯେବେ ଅସ୍ତିତ୍ବ ହରାଏ 

ନଥାଏ ସେଠାରେ ଖୁସି ll