ଜୀବନ ନାଟକ

ଜୀବନନାଟକେ ନିତିଦିନ ମୁହିଁ

କରିଚାଲେ ଅଭିନୟ। 

ରଙ୍ଗ ମାଖି ମୁଖେ ଭୁଲିଯାଏ ନିଜେ

ଆପଣାର ପରିଚୟ। 

ଦୁନିଆ ମଞ୍ଚରେ ନିୟତି ନିର୍ଦ୍ଦେଶେ

କରେ ଜୀବନ ନାଟକ। 

ମିଳୁ ଗାଳି ଅବା ମିଳୁ କରତାଳି

ନକରେ ମୁଁ ମନେ ଦୁଃଖ। 

ହସ କାନ୍ଦ ଭରା ଜୀବନ ନାଟକ

ଛାଇ ଆଲୁଅର ପରି। 

ମଞ୍ଚେ ସିନା ମୁହିଁ କରେ ଅଭିନୟ

ଭାଗ୍ୟ ହାତେ ଥାଏ ଡୋରି। 

ଜାଣେନା ମୁଁ କେବେ ଏହି ନାଟକରେ

ପରଦା ହେବ ପତନ। 

ଜାଣେ ଖାଲି ମୁଁ ଏ ନାଟକେ ନାୟକ

ଅଭିନୟ ମୋ ଜୀବନ। 

ଯେତେଦିନ ଥିବି ଏ ରଙ୍ଗମଞ୍ଚରେ

କରୁଥିବି ଅଭିନୟ। 

ନାଟକ ଶେଷରେ କାଳବଳେ ମୁହିଁ

ଫେରିବି ନିଜ ଆଳୟ। 

ଅଭିନୟ ବଳେ ଜିଣିପାରେ ମୁହିଁ

ଯେବେ ସଭିଙ୍କର ମନ। 

ନାଟଶେଷେ ସର୍ବେ କାନ୍ଦିବେ ମୋ ପାଇଁ

ଧନ୍ୟ ହେବ ମୋ ଜୀବନ।