ଇଚ୍ଛା ହୁଏ

ବେଳେବେଳେ ବୟସର

ଚାଦରଟି ଫିଙ୍ଗି ଦେଇ ;

ଅମାନିଆ ଚଗଲା ମନ କୁହେ 

ପିଲାଟିଏ ହୋଇଯିବା ପାଇଁ।

ଦୁଷ୍ଟାମୀ କରିବାକୁ ,

କଙ୍କି ପଛେ ଧାଇଁବାକୁ,

ଖେଳିଖେଳି ହାତ ଗୋଡ଼ ଭାଙ୍ଗିବାକୁ, 

ଆମ୍ବ ଝର, କଇଆଁ ପଣା କରି 

ସାଙ୍ଗମେଳେ ଖରାବେଳ କାଟିବାକୁ;

ଦୁଷ୍ଟ ହୋଇ ବାପାଙ୍କ ଆଗେ 

କାନ ମୋଡା ଖାଇବାକୁ।

ମା' କୋଳେ ମୁହଁ ଗୁଞ୍ଜି 

ଜହ୍ନ ତାରା ଗଣିବାକୁ; 

ଭାଇ ଭଉଣୀ ସାଥେ 

ମାଡ଼ଗୋଳ ହୋଇ 

ଆଗୁଆ ଜେଜେମା ପାଖେ ଫେରାଦ ହେବାକୁ

ସ୍କୁଲ ବସ୍ତାନି ଫୋପାଡ଼ି

ଭଗନ ପୋଖରୀରେ ବୁଡିବାକୁ

କଇଁ ବେଣ୍ଟ ତୋଳିବାକୁ।

ବେଳେବେଳେ ଇଚ୍ଛା ହୁଏ

ନୂଆ ନୂଆ ପ୍ରେମର 

ପୀଡା ଭୋଗିବାକୁ;

ଆଖି ଭାଷା ପଢିଦେଇ

ମନ କଥା ଜାଣିବାକୁ;

ସ୍ୱପ୍ନର ଉଡାଣ ଭରି 

ଆକାଶକୁ ଛୁଇଁବାକୁ

ମାଟିରେ ନନ୍ଦନକାନନ ତୋଳିବାକୁ

ସବୁଜ ସ୍ୱପ୍ନରେ

ଛାତିକୁ ବଗିଚା କରିବାକୁ।