ହିନ୍ଦୁଧର୍ମ କେତେଦିନ
ହିନ୍ଦୁଧର୍ମ କେତେଦିନ
ଆଉ କେତେ ଦିନ ହିନ୍ଦୁ ଧର୍ମ ଜାଣ
ରହିବ ସାରା ସଂସାରେ
ଦେହ ହାଡ଼ ହୀନ ମନ ଯେ ଶ୍ମଶାନ
ଧର୍ମ ପିଣ୍ଡ ଡ଼ୁବିବରେ ll
ଧର୍ମ ରୀତି ନୀତି ନାହିଁ ଏଠି ଯତି
ଯାଇଛି ଉଡି କର୍ପୁର
ଜ୍ଞାନ କର୍ମ ଭକ୍ତି ଅଶିକ୍ଷା ସଂସ୍କୃତି
ବଢ଼ୁ ଅଛି କୁସଂସ୍କାର ll
ନାହିଁ ଗୁରୁ କୁଳ ବେଦ ଯଜ୍ଞ ଜ୍ଞାନ
ଧର୍ମ ଶିକ୍ଷା ସଂକୁଚିତ
ଦର୍ଶନ ରହିତ ପ୍ରଥା ପ୍ରସାରିତ
ଅସତ୍ୟରେ କବଳିତ ll
ନାନା ପୂଜା ବ୍ରତ ଲିପ୍ତେ ଜଡ଼ ଭକ୍ତ
ଦେଖି ଶୁଣି ଅଭ୍ୟାସରେ
ମେଢ଼ ସାଜସଜ୍ଜା ଭୋଗ ଖାଦ୍ୟେ ମଜା
ଭସାଣୀ ରେ ନାଚିବାରେ ll
ଫେସନ ବଢୁଛି ସତ୍ୟ କାନ୍ଦୁଅଛି
ପଥ ପ୍ରଦର୍ଶକ ନାହିଁ
ଧର୍ମେ ସ୍ୱାଧୀନତା ସତ୍ୟ ଦିଗହରା
ବୁଝିବାକୁ ବେଳ କାହିଁ ll
ମୂର୍ତ୍ତି ମେଢ଼ ଡିଜେ ପ୍ରତିଯୋଗିତା ଯେ
ନୃତ୍ୟ ସଙ୍ଗେ ରସ ମଦ
ଶିଶୁ ଦେଖି କହେ ଧର୍ମ ମାନେ ଡିଜେ
ଭସାଣୀର ଭୋଜି ଭାତ ll
ନାମ ସଂକୀର୍ତ୍ତନ ପ୍ରଭୁ ପ୍ରବଚନ
ବେଦ ପାଠ ହେଉନାହିଁ
ପାଲା ଉପାସନା ସାଧନା ପ୍ରାର୍ଥନା
କରିବାକୁ କେହି ନାହିଁ ll
ବାପା ମାତା ଆଗେ ପରିଜନ ସାଥେ
ପୁତ୍ର ନାଚେ ମଦ ପିଇ
ପୂଜା ବ୍ରତ ନାମେ ଦେବା ଦେବୀ ନାମେ
ଆଧୁନିକ ଗୀତ ଗାଇ ll
ଭାବନା ଧାରଣା ଧର୍ମ ବାଟବଣା
ନୀତି ଶିକ୍ଷା ଜମା ନାହିଁ
କିପରି ରହିବ ହିନ୍ଦୁତ୍ୱ ବଞ୍ଚିବ
ସଂସ୍କାର ଯେ ହେଉ ନାହିଁ ll
ମନ୍ଦିରରେ ପୂଜା ତପ ଉପାସନା
ସର୍ବଦା ଯେ ଗ୍ରହଣୀୟ
ବାଟରେ ଘାଟରେ ବଜାର ଦାଣ୍ଡରେ
ପୂଜା ସଦା ନିନ୍ଦନୀୟ ll