ହାଟକ ଗଉରୀ କଟକଚଣ୍ଡୀ
ହାଟକ ଗଉରୀ କଟକଚଣ୍ଡୀ
କଟକେ ବୋଲାଉ ମାତ ହାଟକ ଗଉରୀ l
ହାଟ ବସାଇଛୁ ଚଣ୍ଡୀ ମାତା ମାହେଶ୍ୱରୀ ll
କଟକ ଚଣ୍ଡୀ ଛଟକେ ଦୋଷୀ ପାରୁ ଦଣ୍ଡି l
ହେମ ମରକତ ମୁଖୀ ମା' ସିନ୍ଦୁର ମୁଣ୍ଡି ll
ମରକତ ନଗରରେ ସୁଖେ ତୋର ବାସ l
ଉତ୍କଳଇଶ୍ୱରୀ ହେଉ ନାନା ଦିବ୍ୟବେଶ ll
କଟକର ଚିନ୍ତା ସିନା ବାୟା ବାଇମୁଣ୍ଡିକି l
ଜଗତଯାକର ଚିନ୍ତା ମାଆ ମୋର ଚଣ୍ଡୀକି ll
କେଶରୀ ବାହିନୀ ମାଆ ହିମବନ୍ତ ଜେମା l
କେ ବର୍ଣ୍ଣି ପାରିବ ମାତ ତୋହର ମହିମା ll
ହାତେ ଧରି ମାଆ ତୁହି ବାରହାତି ଖଣ୍ଡା l
ଦୁଷ୍ଟଙ୍କୁ ସଂହାରକରୁ ଭେଣ୍ଡା ଗଣ୍ଡା ଗଣ୍ଡା ll
ଉତ୍କଳ ଜାହ୍ନବୀ ମହାନଦୀ ତୀରେ ଗାଦି l
ନୀଳ ଜଳରାଶି ବହେ ପାରୁଶକୁ ଭେଦି ll
ନଗର ତୋ'ର ମାଆଲୋ ଧବଳ ଟଗର l
ହଜାର ବର୍ଷ ପୁରୁଣା ସଂସାରରେ ସାର ll
ଗଡ଼ଚଣ୍ଡୀ ବାରବାଟୀ ଭଉଣୀ ତୋହର l
ପାର୍ଶ୍ୱେ ଧବଳ କୁଦରେ ଶ୍ରୀଧବଳେଶ୍ୱର ll
କେଉଁ କାଳୁ ଥାପିଅଛୁ ମାଆ ଦିବ୍ୟାସନ l
ଦେଖିଅଛୁ ଗଙ୍ଗ,ଗୌଡ଼,ଯବନ ଶାସନ ll
ସର୍ବ ମଙ୍ଗଳା ମଙ୍ଗଳମୟୀ ମାଆ ଚଣ୍ଡୀ l
ନାମ ସୁମରଣେ ଯାଏ ସର୍ବ ପାପ ଖଣ୍ଡି ll
ଆଦୃଶ୍ୟକୁ ଦୃଶ୍ୟ କରୁ ମା' କରୁଣାମୟୀ l
ନାରାୟଣୀ ନାମେ ମାତ ବିପତ୍ତି ପଳାଇ ll
ମହୋତ୍କଟା,ବିକଟା ମା' ସଙ୍କଟତାରିଣୀ l
ପାରି କର ମହାମାୟା ଭଵ ବୈତରଣୀ ll